Salíes ucranianes
Duldaba ente promeses o salíes, decidiéndome a la fin por estes caberes, pos, sicasí, ye coincidiendo con una salida o viaxe a esi país cuando a los políticos se-yos calienta la boca. Caún que per ellí pasa nun pierde la oportunidá de prometer dalgún tipu d’ayuda, xeneralmente de calter militar, anque dalgunes d’elles se diluyan col pasu del tiempu, o aporten ellí ensin pasar la ITV; como una partida de Humvees, el toutarren yanqui, qu’apaecieron coles ruedes podres, dexando tiraos a los soldaos ucranianos a les primeres de cambiu. Seguro que supieron comprendelo dada l’ayuda inmensa del gobiernu de Washington.
El nuesu doctor Sánchez tamién tevo en Kiev estos díes, en calidá de presidente del Conseyu Européu demientres esti semestre, y como él mesmu y tantos otros visitantes, tamién sacó’l caldero de les promeses y llanzóse a repartir, entamando col compromisu de sofitu total per parte d’Europa a la causa ucraniana ¡qué menos¡ si tenemos en cuenta que mos va la estabilidá del continente demientres, a lo menos, una xeneración; y pa quien nun lo tenga nidio que-y lo entrugue a los países con frontera cola Federación Rusa; ehí nun tienen dulda.
Yá llanzáu, prometió un Conseyu OTAN-Ucrania que yá esiste va 20 años o más, pero, como cabildrara que sabía a pocu, otra vegada, como la burra al trigu, renovó los Leopard; los cuatro de la promesa de diez qu’ainda falten. Y yá en pleno paroxismu prometedor, la so chequera dio-y pa una dotación de 55 millones d’euros, ¡Qué barbaridá!
Esa cantidá, ye de suponer, va salir del mesmu sitiu que los 20 mil euros que la vicepresidenta de les polítiques chulis ofreció ayeri mesmu a los mozos de 18 años, pa que se llancen a la vida con una bona base material ¡Qué coses¡ Ye un mundiu y una dómina na que, magar la supuesta fiscalización de la vida política pente medies de los munchos muérganos que pa ello esisten, les promess siguen siendo’l preséu de más fácil remanamientu per parte de los nuesos dirixentes. Ye lo qu’hai.
Esta raxona ucraniana llega, precisamente, cuando Ucrania espliega en Bajmut una brigada mecanizada equipada con carros de combate, vehículos de combate d’Infantería y obuses de 155 mm de fabricación sueca, formada por más de 3000 homes y muyeres que foron adiestraos naquel país, que pagólo too, materiales y estancia, con muncha menos importancia de la qu’aquí mos damos, y seguramente con más agradecimientu de Zelensky, que ponía la cara de circustancies que correspondía al presidente del Conseyu Européu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo