El Tour nel Stella Maris
Casi dende que tengo alcordanza, el Tour ye pa min una cita pocu menos que relixosa metanes el branu. A Bahamontes conocílu al traviés la radio, enantes inclusive de entamar les sesiones de catecismu previes a la primer comunión. Dempués vieno la televisión, que naquel Xijón en plenu Plan d'Estabilización yera cosa de mui pocos na so casa, y de dalgunos bares pa la mayoría.
Nel mio casu, la pantalla, en blancu y negru, tamizada pol fumu de los fárias, los comentarios ruidosos, los carajillos, y les copes de Veterano, taba nel Stella Maris de El Musel, au'l mio pa, delles tardes, non toes, llevábame a ver a un Anquetil en plenu apoxéu. Ellí güeyé, creo recordar, la muerte en directu de Tom Simpson nes cuestes ardientes del Mont Ventoux, convirtiéndose, anfetamines mediante, nun precursor de lo que vendría dempués y qu'anguaño conocemos como doping.
El Tour ye como un ritu braniegu pa min, col odiu perenal de la muyer que tien que adautase a ésti, pa ella, antoxu que denota frustraciones deportives mozes. Ye lo qu'hai, anque esti añu, per primera vegada en munchu tiempu, dexé, conscientemente, de ver el Tour mientes dellos díes.
La carrera vixente, agora discurriendo pel centru de Francia, escomencipiaba nel País Vascu, daqué que'l so Gobiernu diba aprovechar pa camudar eses tres xornaes nun aquelarre nacionalista, anque dala etapa pasara per Zugarramurdi. Decenes de miles d'ikurriñes, esa bandiera de raíces milenaries diseñada por un protunazista, col verde col que inconscientemente Arana homenaxaba les raíces bereberes del so pueblu amáu, foron repartíes col patrociniu del gobiernu del PNV, aquel partíu que se dedicaba a recoyer les nueces.
La Guardia Civil de Tráficu, con mártires asesinaos por ETA mientes escoltaben ciclistes vascos, yá va tiempu que dexó aquella tierra cola connivencia del Gobiernu d'España; agora tamién Navarra. Poro nun ye d'estrañar la ausencia de la Benemérita nes imaxes televisives, dalgo que se fae enta más evidente cuando en Bilbao pululen en gran númberu los representantes de toles policíes franceses, incluyendo la Guardia republicana, supuestamente dedicada a la seguridá presidencial y que nun algamo a entender que pinta equí.
Son tres días nos que, quitando unos minutos pa comprobar l'algame de los mios temores, nun seguí'l Tour, qu'esti año, con una presencia menguante de ciclistes españoles, presentase apasionante gracies a los dos monstruos del momentu, un danés que sube como si fuera colombianu, y un esloveno toutarrén pal que la pallabra rendición nun paez tener significáu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo