Rechazo al exterminio, en Siero

En la concentración delante del Ayuntamiento de Siero del 4 de enero, Tina Cuadriello, de la asociación cultural El Llavaderu, y Bibiana Martínez, secretaria de la UC Siero-Piloña de Comisiones, comartían en llingua este pronunciamiento:

Siero por y con Palestina.

“¡Solos en mitad de la tierra, hijos de mi misma madre...!”. Asina recuerda a la xente palestino’l profesor San Miguel nun artículo recién.

Pa San Miguel y otra xente del Comité de Solidaridá cola Causa Árabe, que visitaron los territorios palestinos, y con munches persones amigues ellí, el xenocidiu qu’estroza a esti pueblu tarázalos no más fondo.

Cuando’l sionismu, alma de xelu, cola so terrible máquina de guerra escuarta neños ensin compasión, los sapoza con vida baxo l’escombriu, asesina a periodistes pa que nun denuncien los sos abusos, a médicos pa que nun curen, destrúi mezquites ya ilesies pa que los creyentes nin siquier alcuentren un consuelu imposible, namás-yos queda gritar y maldicir a esos criminales, a los sos cómplices, a tantes supuestes bones persones, tan indiferentes, pol so silenciu escandalosu.

Tampoco esti añu hebo nueche de paz en Belén, nin estrella, nin celebración metanes la carnicería.

Pero énte esi silenciu escandalosu tán alzándose munchísimes voces al glayíu de ¡basta yá! Son voces de persones de bien, de creyencies diverses que defenden los drechos humanos y esixen un mundiu que tien el drechu de vivir en paz. Ente elles hai miles y miles de xudíos, que lloraron de rabia y de pena al gritu: ¡Non nel nuesu nome, Israel nun mos representa!

En Gaza, nun hai una sola persona que salga intauta física o psicolóxicamente. Israel ta cometiendo un actu monstruosu de terrorismu d’Estáu escontra elles.

Siempre hai un preciu por vivir nesa tierra. Hai un preciu por sobrevivir.

Pa la xente palestino’l preciu, de toes toes, ye inimaxinablemente altu. Tán sufriendo la violencia de supremacistes raciales en traxes, que dempués van a la televisión y dicen ser víctimes.

¿Cómo se va arreglar un neñu que perdió la casa, los amigos, la familia?

“Israel morrió como conceptu democráticu. Yá nun hai quien pueda creyer qu’Israel representa valores democráticos nin que son víctima de nada. El mundiu enteru ta viendo cómo’l réxime israelín asesina a miles de muyeres y neños de manera sádica y deliberada. La so imaxe victimista esbarrubó, porque tamos delantre un xenocidiu televisáu. Nin tola propaganda de los grandes medios pue tapar los sos crímenes. Tenemos que siguir presionando pa qu’apare yá esti xenocidiu y pa llevar a los responsables al sitiu que-yos correspuende. Que paguen polos sos crímenes”.

Dízmoslo l’activista Manu Pineda, que tamién vivió en Gaza, y que mos acompañaba en primavera aende en parque delantre la placa y el memorial de Vicente García Riestra, ún de los resistentes al nazismu.

La comparanza ente’l nazismu criminal y el sionismu criminal ta en munchos de los análisis del esterminiu actual. Comparar brutalidaes pue que nun sía mui rigoroso nin acertao. Pero la “indiferencia” que cabrea a San Miguel ta demostrao que quedó instalada en grandes mayoríes na Alemaña nazi, nos gobiernos cómplices del xenocidiu de xudíos, de xitanos, d’homosexuales, de comunistes, de persones con diversidá funcional, d’antifascistes, talamente como agora.

Gobiernos y colectivos miren pa otru llau énte l’horror en Palestina, énte l’apartheid, énte la llimpieza étnica, énte la ocupación illegal, énte l’incumplimientu de les resoluciones de la ONX, énte los llamamientos de la UNRWA, de la ONX, d’Unicef, de MSF, de cualquiera de les instancies que nun callaron frente a la destrucción d’hospitales, d’escueles, d’ilesies y de mezquites, de prisioneros desnudaos y humildaos nes tortures, de les execuciones a sangre frío y delantre de tola familia, o de los francotiradores qu’asesinen cobardemente a les embaranzaes.

¿Y qué podemos y debemos facer?

L’apoyu a la causa palestina ye imparable y sigue aumentando nel Estáu español y en tol mundiu con una movilización ciudadana escepcional que confronta la inaición de la clas política, sobre manera nos Estaos de la exa euroatlántica. L’Estáu español ye cómpliz nesti xenocidiu, yá qu’otorga reconocencia diplomática, aporta apoyu políticu y militar y caltién a Israel como sociu estratéxicu nel marcu de la Xunión Europea.

Mientres, tamos viendo cómo Estaos del sur global, altos cargos d’organizaciones internacionales, sindicatos, ONG y movimientos sociales de tol mundiu tán tomando posición y actuando en consecuencia frente al réxime d’apartheid israelín, esixendo qu’Israel cumpla col drechu internacional y decrete l’altu’l fueu y el cese de toa violencia indiscriminada hacia’l pueblu palestín.

Deberíemos contribuyir a ello, y esixendo la fin permanente de la compraventa d’armes y la collaboración militar y de seguridá con Israel.

La ruptura de rellaciones académiques, comerciales, culturales, diplomátiques, institucionales y polítiques col réxime israelín.

Como parte de la campaña global de BDS, l’adopción de sanciones económiques a empreses que se beneficien de les polítiques d’apartheid israelín.

Recuperación de la xurisdicción universal col oxetivu de romper con 75 años d’impunidá de crímenes escontra la humanidá israelinos y empecipiar los procedimientos oportunos pa llevar a Netanyahu y les autoridaes militares y polítiques del apartheid y del xenocidiu israelín responsables d’estos crímenes al Tribunal Penal Internacional.

Fin de la ocupación israelina, fin del apartheid y drechu al retornu de la población palestino refuxao.

Derogación de la Llei Mordaza y fin del racismu institucional.

Nun contestu de retrocesu européu nel drechu a la llibertá d’espresión, les manifestaciones de solidaridá col pueblu palestín qu’esixen a los gobiernos el cumplimientu de los drechos humanos tán criminalizándoles y penalizándoles lleis autoritaries como la Llei Mordaza. Esiximos la so derogación pa garantizar l’exerciciu democráticu de la llibertá d’espresión. Oponémosmos a tou tipu de racismu, incluyendo’l racismu sionista, el racismu xudeófobu y el racismu islamófobu, que nun dexa d’espoxigar n’Europa de la mano de la estrema drecha. Esiximos l’acabu del racismu institucional européu y español y sumámosmos a les demandes de la campaña #RegularizaciónYá.

En Siero en particular debiéramos facer honor al últimu de los Premios de DD HH, l’entregáu a la Flota de la Llibertá-Rumbu a Gaza, honrando los sos oxetivos de francer el bloquéu criminal a Gaza, pa que... dende’l ríu hasta la mar Palestina recupere la so llibertá.

¡Puxa Palestina llibre!