El tapáu
Ye la polarización, pallabra que tien sío escoyida por FundéuRAE como la del añu, la carauterística más sobrosaliente na política española anguaño, pa desgracia de toos nós, pues ello lleva a centrar l’esfuerciu nel acabamientu ya inclusive destrucción del alversariu, en llugar de dedicar los enfotos a esi cacarexáu bien común que tanto aflora na boca de los nuesos próceres. Ye lo qu’hai.
El casu ye que, nel partíu del Gobiernu, paez estendese’l sentimientu de que, tres estos años de reinao sanchista, va haber que proceder a un ciertu refundamientu, o catarsis que diríen otros, puesto que l’actual sistema internu de promoción d’adeptos y defenestración de toos aquellos que s’atreven a manifestase, no yá escontra’l secretariu xeneral sinon n’oposición a dalgunes de les sos polítiques, o simplemente amosase tebios nel aplausu al líder, va acabar por dexar un partíu d’encefalograma planu y unos cuadros inservibles tres años d’obediencia bovina.
El problema, pa esta supuesta renovadura, ye que se fae necesariu un líder nuevu, dalgo que, teóricamente, resuelvese con esos procesos de primaries que tienen trayío a personaxes como’l propiu Sánchez, o’l yá desapaecíu Casado nel PP, esto ye, procesos que ponen a los partíos al borde del precipiciu, por más que nalgunos casos puedan acabar en Moncloa.
El Partíu Socialista anguaño, ente otros, amuesa’l rasgu de nun contar con dala figura rellevante tres el líder, al contrario que’l PP, nel que casi hai inflación. Page nun cuenta, por más qu’él quisiera. Y eso llevamos a guetar nicios que mos puedan sollertar de per ónde van, en casu de que yá tean en marcha, o van dir, si lo dexamos al albur de los futuribles, les posibles maniobres internes pa sacar al partíu del estancamientu au van acabar tres la perda del Gobiernu.
En díes recién tíense desarrollao en Madrid un actu coloquiu n’homenaxe a la Constitución y a Peces-Barba, al qu’asistió lo más granao de la vida política y económica del país, atrayíos ensin dulda por Felipe González, al qu’acompañaba nel escenariu un Eduardo Madina “retiráu” dende va unos años de la política, y dedicáu anguaño al mundiu empresarial como cuadru d’una de les grandes consultores del país.
Entrecomillo lo de retiráu porque los políticos, como los toreros, entren y salen na situación d’actividá con facilidá estrema, y esta reaparición cuidada del señor Madina, que nun tien dexao de ser miembru del Partíu Socialista, suéname a min como un avisu a navegantes, patrocinao nada menos que por González.
Nun sé si yo, lector humildosu de periódicos, voi tar no cierto, pero paez un destape del tapáu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo