Camudamos horros por monigotes
El 19 marzu pasáu enterábemosnos peles redes sociales del enésimu capítulu de destrución a conciencia del patrimoniu cultural asturianu per parte les mesmes instituciones públiques que habríen cuidalu, promocionalu y arriquecelu, dando cumplimientu al artículu 46 de la Constitución. Tratábase del valtu d'una panerona centenaria en plena villa de Salas, fechu que foi denunciáu pola Asociación d'Amigos del Horru y por otres instancies, aparte recibir la indignación social xeneralizada nes redes. Pos bien, malpenes un par de selmanes dempués, esti 4 d'abril, salía la noticia n'entrevista al alcalde la llocalidá, Sergio Hidalgo (Foru), de que na mesma villa Salas el Conceyu adquirió la estatua del personax de Danonino que presidía la fábrica Danone acabantes de pesllar nel municipiu, supongo que como premiu a tal aición. En declaraciones públiques a los medios, aseguraba qu'esperaba tuviere reclamu turísticu y que, nesti sen, tendría más éxitu qu'el pitufu llantáu meses atrás en Llugones (Sieru) por Ángel García "Cepi" (FSA-PSOE), onde tamién naquel momentu ficiérese usu d'esti mesmu argumentu. La comparanza (y la gravedá l'asuntu) vien como aniellu al deu cuando reparamos en que non solo va de monigotes de collores la cosa, sinón que nel casu llugonín tamién esa estatua llantábase de manera simultánea al valtu nes cercaníes (nel área recreativa de L'Acebera) d'una casa mariñana bicentenaria, ayalga etnográfica viva que mos amuesa'l mou en que les clases campesines vivíen n'Asturies va doscientos años, un exemplu únicu en tol país una vegada'l conceyu Carreño llideráu por Amelia Fernández (FSA-PSOE) ficiere lo propio cola casa mariñana d'El Fondo-Quimarán, a les faldes del Monte Areo, una casa que venía recoyida nel propiu folletu turísticu conceyil. Por desgracia pal turismu, y entiendo que tamién pal patrimoniu'l país, nesti conceyu nun se llantó dengún monigote. Polo visto, como dixo públicamente l'alcalde Salas, llantar monigotes multicollores pa los críos ta de moda, y ye lo que supuestamente va atrayer visitantes, non el patrimoniu medieval col que cunta'l conceyu, el patrimoniu etnográficu que tanto paez estorbar o'l patrimoniu natural que mos arrodia, sinón los moñecones de collorinos. Esti ye'l conceptu patrimoniu cultural y de la promoción d'Asturies que rixe a día güei en bona parte la clas política asturiana: moñecos, sí; elementos hestóricos arquitectónicos (o muebles), non. Una hestoria, ta claro, que s'escribe en tonu de traxicomedia y que fala bien a les clares del nivel cultural de quienes mos representen.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo