Vieno del otru mundiu
Ello qu'el 5 de setiembre de 1986, Concepción González Argüelles (Conchina), qu'era nacía de Lledíes (como dicían los antiguos del llugar), un pueblu de la parroquia llanisca de Santa María de Valdellera, cuntómi una de las hestorias más güenas qu'udí al respetive de xente del otru mundiu.
Mui curiosa, como digo, porque ta dicha na jabla de Llanes y porque parlló tamién de cómo se vivía antiguamente. Esta é:
Anantes había munchu miedu a los difuntos. Dicía la xente:
El cárabu y la niétova durmieren xuntos, porque dicían que tenían miedu a los difuntos.
Mio güelu se murió ena Mina Bujarrera. Sin funerales (no había con qué pagalo), quedó enterráu en cimenteriu Cuadonga. Mio güela quedó viuda, con dos jiyos de trece y decisiete años. Vivían en Sandinel, un barriu de Lledíes.
Mio güela y mio madre durmían en un cuartu de tabiques de zardu (revocaos con moñica pa tapar las rendixas) y una puerta de tablas de caxón.
El mogote durmía en otru cuartu jechu de imprenta (ponían barrotes, y entre ellos piedrinas y barru). Tou estaba ajumáu de la zarda. El jiyu durmía en un xargón de capulla, y mio madre con mio güela en una cama de barandilla toa estartoriada, tamién con xargón de capulla, que estaba llenu pulgas, peoyos como tucos y ratos como zapatos (y, además, una gallina cenicienta ponía los pies en xargón).
Una noche, despierta mio güela y ve una claridá mui grande en cuartu.
Se llevantó y vio que, per entre la rendixa de una ventanona toa cayendo, se metía una lluz como una barra de sol y diba directa a la puerta el cuartu. Se asustó y llamó a la jiya:
-¡Consuelo!
-¡Señora!
-¿Tu no ves una claridá mui grande en cuartu?
-¡Ai, ai!; sí, señora.
-¡Ai!, ¿será to padre, que no se jezo nada por elli?
-¡Ai!, sí, señora, vamos llevantanos.
Se llevantaren y vieren cómo se iba desjaciendo la lluz. Callaren la boca y pela noche no durmieren un sueñu.
Enfrente la casa estaba la casa ganáu col jenal. A la segunda noche, garraren una manta porruana y se joren a durmir los tres al jenal, encima la pila la herba. Per entre las sustechas estuvieren mirando a ver si llegaba la lluz.
A la misma hora, a la segunda cantada de los pollos vieren la lluz, pero esta no joi a parar a la casa ganáu sino que se metió pela ventana la casa.
Pela mañana, mio güela pensó:
-Debe de ser to padre. Como no se jezo por elli, y-jará falta algo. Si vien esta noche, jablo yo.
A la tercera noche, jabló mio güela:
-Si eres cosa del otru mundiu, dimi qué ti ja falta, y si eres cosa de esti, vete y déxame en paz.
Pero la lluz no dixo nada y se joi. No golvió más.
Entós, va mio güela onde un hermanu del difuntu, que se llamaba Xico Argüelles, y cuntó-y la historia:
-Mira, Xico, no se jezo nada por Lin y me pasó esto.
Y Xico joi a estar col cura, que se llamaba Don Rosendo, echaren los funerales y manu de santu, que nunca más tuvieren miedu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo