Usu y abusu del xenocidiu
Toles pallabres son importantes, ensin esceición, anque dalgunes contienen nel so interior connotaciones que van más allá de les persones y de los tiempos. Una d'elles ye la que da pie a esta tribuna, el xenocidiu, estos díes en boca de munches persones, individuos y personaxes, pero de la que'l DALLA mos diz que se trata del "desaniciu o estermín (d'un pueblu, d'una nación)", con lo que "afita", d'alcuerdu colos oxetivos de la so esistencia, l'algame de la pallabra. Pa toos n'Asturies, y al mou como lo fae la RAE pa España, inclusive pa los políticos.
La esquierda populista, na que tamién paez encuadrase'l partíu principal del nuesu Gobiernu, tiense llanzao nuna campaña, teóricamente de sofitu al pueblu palestín, anque beneficie direutamente a los terroristes de Hamás, na que l'usu del términu xenocidiu sirve pa xustificar el mensax y tamién les aiciones polítiques, inclusive les de calter internacional, y yá de pasu la demonización de la oposición, non abondo allineada con eses tesis.
La crisis, entamada col ataque terrorista a Israel, l'únicu país democráticu de la rexón, con 1.139 muertos y 245 secuestraos, la mayoría civiles y munchos d'ellos neños, tien derivao, como guetaba Hamás y el so patrocinador Irán, nun combate cruentu en población -el más difícil y mortíferu ente les modalidaes que la guerra desarrolla- del que los civiles de Gaza son les víctimes principales. Pero eso nun ye un xenocidiu.
Xenocidiu fo'l de Ruanda, el más recién, tamién el del pueblu armeniu en 1915 a manes de los turcos, y, sobremanera, el de los xudíos europeos demientres la Segunda Guerra Mundial, con direición nazi y cooperación de munchos en munchos países, non namái n'Alemania. Ye lo qu'hai, y amás ye imposible de camudar. Poro debiera llamar l'atención l'usu y abusu del términu por parte de la esquierda populista.
A min, qué quieren que-yos diga, tráeme l'alcordanza d'aquel "Non a la guerra", secundáu pola tropa zapateril nel casi lloxanu 2003, con ocasión de la Segunda Guerra d'Irak, y que dio, ente otres coses, pa un maxistral llibru de Gustavo Bueno, "El pensamientu Alicia", nel que describía la inanidá del pensamientu políticu de talu personaxe singular, que la so eleición pa dirixir el Gobiernu de la nación en dos ocasiones da cuenta perfeuta de la clas de sociedá que somos.
Esta fola nueva de vacuidá política naz, como munches otres, neses universidaes norteamericanes, enantes templos d'escelencia y güei acaroñaes pol pensamientu woke, que llega depués a Europa, au una xeneración estudiantil güérfana de conceutos la abraza ensin saber qué hai detrás.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo