El Foru Itálicu de Roma
Tenémoslu estos díes nes nueses pantalles. Tráemoslu la imaxe de los Campeonatos europeos d'atletismu que se celebran na capital d'Italia. Una semeya que'l vienres, primer día d'una serie que va durar una selmana, resultaba impactante mientres la prueba de marcha atlética femenina en cuantes que discurría ente pinos mediterráneos y cipreses, típicos elementos arbóreos de la zona del Lazio, au s'alluga la ciudá del Coloséu, anque lo que más sosprendía yera la sucesión d'estatues marmórees descomanaes en representación de modalidaees atlétiques estremaes, tantes y tan guapes qu'unu de los comentarists esclamó que taben, ensin dulda, nel área deportiva más bella del mundiu.
Y nun ye pa menos, el Foru Itálicu, como'l barriu del EUR, Esposición Universal de Roma, ellí allegáu, representen una de les operaciones estétiques más ambicioses del réxime fascista de Benito Mussolini, que pente medies del urbanismu y l'arquitectura pretendía unviar un mensax políticu en clave nacional ya internacional cola construcción d'un macrocomplexu deportivu espectacular nel so momentu, y aína anguaño, como amuesen les imáxes.
El casu ye qu'ellí sigue, pa reviciu de quien lo quiera apreciar y pa usu de tol sistema deportivu italianu, aparentemente íntegru, ensin que los estremaos gobiernos italianos quitáran-y nin una llosa de mármol, como amuesa la plaza central, na que podía lleese nel suelu distintes plaques cola lleenda "Duce anno I", qu'imaxino facíen referencia al hipotéticu Novo Imperiu que'l paisanu pretendía construyir.
L'enfoque italianu haza'l pasáu ye radicalmente diferente del de nueso, puédese ver a lo llargo de la península, con exemplos magníficos como la Estación Central de Milán, y ellí, magar tar llegalmente prohibíu'l fascismu y el so aponderamientu, tienen una mentalidá artística y práutica pernidia, y nun se destruyen o dexen esbarrubar, faltos de la caltenencia fayadiza, obres que tienen un valir artístico altu. Ehí lo dexo.
N'Asturies, tres años d'abandonu, paez que, por fin, comprendimos que la Universidá Llaboral de Xixón ye una obra impresionante amás de conducente, magar ser iniciativa de Girón de Velasco, un de los xerifaltes franquistes, y, como nel Foru Itálicu, dánse-y los usos académicos y artísticos que'l magnu edificiu puede contener. Nun ye mal camín.
El caso ye que los campeonatos d'atletismu celébrense metanes unes eleiciones europees de fondu significáu pal futuru d'Europa. Un futuru, pa dalgunos, enllenu de menacies de tipu estremáu, nel que la conocencia de la historia y la cultura va ser d'importancia vital p'afrontalu con ésitu. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo