Cuarenta de mayu
Esti domingu pasáu yera la víspora d'esa fecha mítica. Hasta'l cuarenta de mayu nun te quites el sayu, que diz el sabiu refraneru castellán, y peles cais de Xixón podía apreciase perfeutamente que'l personal andaba en tracamundiu; por munches razones.
Había dellos llugares y situaciones p'apreciar l'estáu d'esa enayenadura nuna mañana que lloñe de ser esplendia, tocantes el tiempu, paecía enllenar de duldes l'ánimu de los andariegos. Unos pasiantes que yeren ensame allá perdayuri, pero qu'espresaben especialmente lo estraño de la situación nun Muru de San Lorenzo nel que podía apreciase personal en camiseta al llau d'otros que portaben ensin problema l'anorak de l'hibiernu pasáu, y distinguir a los playos auténticos pol paragües preventivu que garraben en mano. Un muru atestáu de xente que güeyaben, de regüeyu dalgunos, y con ansiedá la mayoría, haza esi arenal en baxamar, con una inmensidá de metros cuadraos vacíos de cuerpos tostándose al sol, que ye lo que tocaba a estos altores, y con una Escalerona rindiendo honores al Sporting, dalgo que non asocedió cola enseña nacional con ocasión del Día de les Fuercies Armaes.
Quiciabes la semeya más triste dábenla aquellos que rodaben les sos maletas de fin de selmana pel paséu, con una espresión ente murnia y encurniada, como si daquién-yos tuviera engañao tocantes cola prometida "Florida" del norte; esa Asturies que dalgunos columnistes pinten con un futuru turísticu gayasperu gracies al cambéu climáticu. Esos güeyaben l'arenal como'l presu que mira los praos dende la so celda. Ye lo qu'hai, dirán dalgunos.
El restu de la ciudá, atarraquitada hasta'l requexu caberu, ensin un buecu na más humildosa de les terraces, con cafés, sidreríes y garitos atestaos perdayuri, daba imaxe identica; hasta paecía qu'hubiera atacamientu pa votar subiendo pela cai La Merced, na mesa electoral qu'ellí s'alluga. Yera la ciudá una espresión viviente y dinámica d'aquel "toos a la cai", que supongo que daquién tendrá glayao dalguna vegada en dalguna parte. Como si quedase en casa fuera un pecáu, nesa víspora de fecha tan mítica.
El casu ye que güei yá tamos nello, y el sol paez xugar con nós, sonriendo a ratos, y otros amosándose focicón, y siempres con un Nordestín que caltién a raya a los bañistes. Nin siquier el Sporting pudo iguar la xornada ayeri, pos el resultáu fiede más a traxedia, o a cadabre si se prefier, qu'a otra cosa.
Cuarenta de mayu, n'alcordanza d'aquellos otros tiempos, cuando llovía, y nel Muru había espaciu de sobres.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo