El silenciu ya'l ruxíu
Acábense les Olimpiaes parisines, tan esperaes tres la traxedia que representó’l covid pa los nipones, y a mín quédame como un taste amargosu de la esperiencia, que, como n’ocasiones enantes, traté de siguir con especial procuru a los deportes primixenios, esto ye, l’atletismu.
De la actuación española, nel so conxuntu, diría que fue lo esperao, o lo que ye lo mesmo, inferior a lo qu’una nación del nuesu valumbu económicu y poblacional podría facer, y ye que, debemos reconocelo, nun podemos ser, según el nuesu propiu criteriu, el país au meyor se vive del mundiu -vános la marcha- y, al mesmu tiempu, atopar mozos abondo dispuestos a sacrificar los meyores años de la so vida somorguiaos nuna disciplina férrea y cuasi monacal, sacantes que se trate del futbol, o de los deportes, digamos, profesionales, ehí yá ye otru cantar. En fin, va haber que siguir esperando la surxencia d’individualidaes, como siempres.
Paris vase escaecer lluéu. Faltaba un oxetíu dende l’entamu, y la ceremonia de inauguración vieno a confirmalo. Naide sabe qué ye lo que se quería tresmitir, y too ello a costa del protagonismu de los deportistas nel estadiu olímpicu, como siempres, como seguramente tornará a ser. Si se quería presentar Paris, cabe dicir que se trataba de una babayada, pues la ciudá nun necesita presentación, y les so vistes quedaron meyor nes pruebes que nella se realizaron que na propia inauguración, toa ella trescalada de un mesaxe, nel meyor de los casos, incomprensible, y nel peor, iconoclasta y faltu d’estilu, precisamente en Paris. Ye lo qu’hai.
A la fin queda l’estadiu, como siempres. Un estadiu qu’andaba a la gueta d’un héroe, quiciabes el remplazu d’Usain Bolt, que nun pudo ser, o seique lo seya esa Beatrice Chebet, la keniata que fue a ganar les dos pruebes del fondu, el 5.000 y el 10.000, anque nun seya tan curiosa, por muyer y africana, pal mundiu de les grandes marques deportives; si bien ye probable que pa l’alcordanza quede la singladura aérea d’esi gondoleru de la pértiga que ye Mondo Duplantis, tan roxu, tan mocín, tan como despistáu; ye ideal, y él va ser, posiblemente, l’héroe.
Pero los 80.000 espectadores dícenmos más coses, pente medies el so silenciu al entamu de les pruebes, un silencio más fonderu cuanto más cortiu ye l’espaciu, y qu’algama’l quietismu casi absolutu cuando lleguen los cien, la velocidá total, pa españir nun ruxíu bestial que dura los menos de diez segundos de la carrera. Eso y los tres cubanos, agora europeos, que se lleven les medalles del triple saltu.
Paris, c’est fini.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo