El Valle de Mijares (Llanes)
Ello qu’el valle de Mijares, que ta nel mediu del conceyu Llanes, son nueve pueblos: Purón, Andrín, Cue, L’Acebal, Covielles (qu’estos dos xuntos son hoi San Roque l’Acebal), La Galguera, Soberrón, La Portiella y La Pereda.
El valle de Mijares (no se rexistra *Miyares, que yo sepa) era una entidá almenistrativa, más que nada n’asuntu del monte, onde taban muchos meses del añu pastoras, pastores, pastorinas y pastorinos, qu’en Llanes lo corriente era que subiera mucha xente y tola familia (o casi) a los sitios del monte. Mio tataragüelu Joaquín Sordo Pérez (La Galguera, 1823-La Portiella, 1907) joi nombráu nuna xunta iguada en 1887 en San Roque l’Acebal “Presidente de la Junta Administrativa del Valle de Mijares para la custodia y coto del Monte de la Mardola”.
Los pueblos del valle tenían rayas con otros pueblos; muchas d’ellas no las sé pero, un suponer, la de La Portiella cola villa de Llanes taba na Caleya la Bárcena, y con Cue diba pel Castru Toró, per una piedra n’El Condáu y per Piedra Llobal.
La Galguera y Soberrón, que son dos aldeas chicas, celebran xuntas el primeru de mayu, al par de la capilla de San Felipe, que ta en Soberrón, una función qu’é de las más tradicionales del conceyu y que los antiguos llamaban de San Jelipe, cola consonante je, que, como é bien ciertu, é asturiana bien neta y mui mui antigua de la Península, pos la efe vien d’otra península, la italiana. Hai que dicir que la variante San Felipe siéntese hoi muchu más.
La pica más nombrada del valle é el Picu Castiellu. Dichu asina, con una diptongación que tien tamién el sable de Castiellu, en Pendueles, pero no el Picu Castillu en Rales, topónimu con una metafonía arcaica; los tres sitios tan dientro del conceyu Llanes.
La divinidá del valle vivía na Cueva la Mora, nuna cuesta del Picu Castiellu; sobre ella cuntaban nestos pueblos, n’otros de Llanes y na Villa, dellas de las hestorias mitolóxicas más curiosas d’esti sen.
Ya no quedan pastoras ni pastores nos pueblos del Valle de Mijares, a lo menos de los de vivir en monte pel veranu, pero el Picu Castiellu y la función de San Jelipe (o, como digo, San Felipe) siguen onde taban, igual que los sables (o arenales), las islas, los cuetos, las cuestas, las cuevas, las torcas, las jayas, el jelechu, las vacas, los páxaros y otros asuntos del valle, que los antiguos y los d’hoi que quieren nombraban colas pallabras de la jabla de Llanes.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo