Conciertu priváu de Serrat
Non tol mundiu pue presumir d'asistir a un conciertu priváu de Joan Manuel Serrat, y, nel mio casu, va tantu tiempu que yá casi lu tenía escaecíu, pues asocedió al entamu del añu 1996, en Medjugore, en Bosnia.
Como suel ocurrir nestos casos, too foi frutu d'una casualidá, el güei premiáu col "Princesa d'Asturies" viaxaba haza Saraxevo cola intención de dar un conciertu nel nome d'una organización non gubernamental española, pero les condiciones meteorolóxiques, que nos Balcanes n'hibiernu suelen ser mui radicales, decidieron que nun yera oportunu y soltaron un diluviu que, si non universal, sí foi abondo bayurosu como pa enchir en dellos puntos el ríu Neretva y tayar la carretera que sube haza la capital bosníaca.
El casu ye que, faltos d'otra solución, vinieron a recoyese con nós, el personal de la Brigada de Montaña "Aragón", que formábemos naquel entós la fuercia española esplegada naquella tierra, primer como cascos azules y yá entóncenes baxo la bandiera de la OTAN. Na nuesa base l'oficial de prensa yera tamién l'encargáu de les rellaciones públiques, y a él-y tocó "llidiar" con aquella papeleta demientres los tres díes nos que mos acompañó, amosándo-y cuálu yera'l nuesu cometíu y averándolu al problema xeneral de los Balcanes, pero, la nueche cabera, nun sé yo si pola so iniciativa o pola suxerencia d'aquel oficial, acudió a acompañanos na tasca de mala muerte qu'una muyer croata caltenía a les puertes de la base.
Dalgunos de los parroquianos tábemos sobro avisu, nun yera una certidume, namái una posibilidá, pero en cuanto que lu vimos entrar garrando una guitarra comprendimos que díbemos ser agasayaos con dalgo verdaderamente insólitu, un conciertu personal y priváu de Joan Manuel Serrat. Y foi memorable.
Atendió toles peticiones, entamando por "La saeta" qu'a toos emocionó, y tamién la petición d'un teniente mozu namoráu que-y pidió les "Paraules de amor". Contentó a casi tol mundiu, a la so iniciativa regalómos un "Fulles mortes" que dixo compusiera demientres el so serviciu militar en Jaca, influenciáu poles imaxes serondales de la ciudá.
La parte final del conciertu foi un poco como homenax al orixe aragonés de la fuercia militar, pero tamién, según mos dixo, al de la so ma, natural del pueblu zaragozanu de Belchite, escenariu d'una batalla tarrecible demientres la nuesa Guerra Incivil, y consistió nun repertoriu de les conocíes como "Xotes de picadillu", o picantes, tamién se podría dicir, qu'a toos mos dexó estelaos.
Tres ello despidióse de nós. Al día viniente, cola carretera abierta, diríase a Saraxevo, y yo alégrome güei de l'alcordanza, y tamién del so premiu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo