L'Estaú ineficiente
Si se dedica un par de minutos a pescudar cómo defín al Estáu la nuesa Real Academia Española, aquella encargada d'afitar y dar esplendor a la nuesa llingua, atopámonos con que ye "el conxuntu de los poderes y muérganos de gobiernu d'un país soberanu", anque, si un lexema tien de tener significáu en sí mesmu, nesti casu, creo, habría qu'amestar l'apartáu de lleis y normes que ponen en rellación a esos poderes, como ye'l casu, nun estáu como'l de nueso, autonómicu.
L'Estáu, como talu, nun ye más qu'un preséu p'algamar el bienestar de los sos ciudadanos, o la felicidá, como declara la Constitución de Bután anguaño, o como afirmaba l'artículo 13 de la nuestra pernomada Constitución de 1812, y, dende esti puntu de vista, cuando l'Estáu nun ye a llograr los fines que xustifiquen la so esistencia podríemos entamar a falar d'un Estáu fallíu, o, a lo menos, ineficiente. Ehí ye onde me paez que mos atopamos.
L'Estáu franquista, aquel fináu cuando entró en valir la nuesa Constitución anguaño, cuntaba ente los so llogros el tener dao vivienda, sanidá, educación, vacaciones pagaes y un Seiscientos a los españoles, pero, a la fin, yera ineficiente porque, ente otres coses, el ciudadanu yera infeliz, y a la muerte del xeneral, de vieyu, el propiu sistema autodisolvióse pente medies la llei pa la Reforma Política de don Torcuato Fernández-Miranda.
El resultáu d'aquello foi'l nuesu Estáu autonómicu anguaño, diseñáu p'averar l'Alministración del Estáu al ciudadanu, conceuto qu'entraña es sí mesmu bondaes induldables pero que, con desgraciada frecuencia, pon n'evidencia disfuncionalidaes estremaes, particularmente nel campu de la educación y de la sanidá en xeneral, pero, nesta ocasión, y a falta de saber les cifres definitives cuando esto escribo, nel área de les catástrofes, cuando les competencies o responsabilidaes de les distintes alministraciones se superponen, o, simplemente, nun tán abondo nidies. El resultáu de la disfuncionalidá mídese en muertos.
La gota fría monstruosa qu'acaba d'afectar al sureste de la península especialmente tien amosao, una vegada más, que los mecanismos de coordinación ente les diverses autoridaes del Estáu nun funcionen cola eficiencia que cabría esperar d'un Estáu que presume de ser modernu y conducente. Los muertos, crecientes y aínda por determinar nel so númberu definitivo, dan cuenta dramática de la realidá del nuesu estáu Autonómicu. Faise preciso reflexonar al respeutu.
Güei, y los días vinientes, vamos asistir a una partida de pelota ente los distintos responsables pa intentar quitase d'enriba los muertos y que seya la otra Alministración quien cargue col pesu de la opinión pública. Hasta la próxima si nun tomamos midíes.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo