Retruque a la señora conseyera de Cultura y Turismu
Nel artículu «Recta cultura» (LA NUEVA ESPAÑA, 21 de xineru del añu qu’andamos), la conseyera de Cultura y Turismu fai un repasu, puntu per puntu, de les aiciones d’esi departamentu dende les eleiciones autonómiques del 2007. Asina, dientro de cada grupu d’elles (instituciones, patrimoniu históricu, arqueoloxía, etcétera) va mentando una por una les qu’a la conseyera-y paecen de más puxu (polo menos 30, que cita polos sos nomes y apellíos). Pero cuando aporta a la cuestión del asturianu, diz lo que va darréu: «... nuestras políticas a favor del asturiano, que han continuado avanzando en estos años hasta alcanzar la lengua niveles de protección y promoción que están a la vista».
Equí, a diferencia de cómo fizo con toles demás aiciones, nun pon exemplu dalgunu; sólo diz que lo que se fizo ta a la vista. ¿A la de quién, señora conseyera? ¿Pero nun ve que nun ye a dicir nin una sola aición favoratible al asturianu? Y eso ye, cenciellamente, porque, quitando cuatro subvenciones que dan al añu, nun ficieron nada de rellume. Cómo sedrá lo poco que ficieron dende’l so departamentu pol asturianu que nin si quisiera fueron a asoleyar (pal casu de que tea fechu) l’informe esi qu’anunciaron va yá unos años sobre los resultaos del Plan de Normalización Social del Asturianu. ¿Ta esi informe en dalgún sitiu, señora conseyera?
Persabemos que nun tamos agora pa gastos, por eso, dende l’aconceyamientu de xuristes pol asturianu vamos echa-y una gabita diciendo-y qué midíes pue tomar d’equí a les siguientes eleiciones; midíes que sí sedríen de promoción del asturianu, y que, amás, van sali-y de baldre:
- Falen usté y los demás conseyeros n’asturianu na Xunta Xeneral del Principáu d’Asturies y énte los medios de comunicación.
- Afale a los funcionarios a emplegar l’asturianu nel so trabayu, en cuentes de torgalo y facer que, por eso, tengan de trabayar el doble.
- Diga a tolos presentadores de la RTPA que seyan asturfalantes, que lu falen nos sos programes y que lleven a ellos a xente que lu sepa y lu fale.
- Dean dalgún telediariu n’asturianu.
- Cuando s’encarguen carteles, anuncies y cartafueyos, que la metá seyan n’asturianu.
- Faiga los cambeos afayadizos pa que cuando se pinche Asturias.es salga lo primero la páxima n’asturianu.
- Cree un premiu honoríficu pa les empreses que más y meyor empleguen l’asturianu na so actividá empresarial (campañes publicitaries, etcétera) y llueu dean la noticia de los ganadores na RTPA, qu’eso ye publicidá de la bona y de baldre.
- En tolos procesos pa dar subvenciones p’actividaes culturales, etcétera, dean dalgún puntu más a los que presenten les sos solicitúes y documentación n’asturianu.
- Ponga l’asturianu al altor que merez nos premios «Príncipe d’Asturies».
- Como ye’l que más sal peles televisiones d’ámbitu nacional, pónga-y al Sporting de Xixón como condición pa siguir subvencionándolu que na camiseta apaezan «Asturies» y «Xixón» con lletres bien visibles.
Xosé María Estrada Janáriz,
Presidente del Aconceyamientu de Xuristes Pol Asturianu, Uviéu
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo