Laviana y les luces navideñes
Igual qu'el anunciu de los años 70: vuelvo a casa por Navidá.
Desde tierres vecines supe que Laviana taba sin luces navideñes. Po lo visto dábense dos versiones: que l'Ayuntamientu taba tan empeñáu coles eléctriques y nun tenía créditu, cosa que nun podía ser, ya qu'aseguren habelu saneao va unos años; la otra yera que se facía en solidaridá colos afectaos poles riaes en Valencia, pa manda-yos les perres aforraes.
Llego a La Pola'l día 20 y esa misma tarde-noche prenden les luces. Un encendíu discretu: carretera general, plaza l'Ayuntamientu y l'Avenida. Y nun tan enceses tola noche, apáguense na madrugá hasta'l día siguiente, como tien que ser. Luces pa munchos escases, pero pa otros bastantes.
Al acabar noviembre anuncióse a bombu y platillu les feches d'encendíu de les luces navideñes nos distintos conceyos y ciudaes del país. Una carrera llocos na que va de líder el malversaor de Vigo, al que munchos quieren adelantar. Los medios, animaores del despilfarru, hablaben de les sonrises de la xente; ¡vamos!, alcaldes que reparten felicidá. Y eso da votos. Con tal grau d'infantilismu tenémosmos por sociedaes avanzaes. Será porque "avanzamos" a pasu agigantáu a la catástrofe total. Les rises de hoi mirando lucines de colorinos serán berros mañana pa nietos, biznietos y los que vengan detrás, que paez qu'a naide importen; el mundu nuestru piensa nel presente, y los políticos nun ven mas llonxe de cuatro años: les siguientes elecciones.
Pienso que debería decretase por ley prender les luces navideñes como muncho cinco díes antes de Navidá, porque los ayuntamientos, empeñaos o saneaos, podrán pagalo, pero la enorme cantidá d'energía derrochá ye contaminación de regalu pal planeta. Contaminar contaminamos toos, respirar contamina y nun vas afogate por solidaridá; pero contaminar por gusto ye penable y debería perseguise por atentáu ecológicu. Les consecuencies de los nuestros actos contaminantes tamos viéndoles ca vez más clares, ya nun hai disculpes ni primu que puea contradecilo. Lo buenos y respetuosos que díbemos ser n'acabando la pandemia quedó nel olvidu. Volvemos a contaminar más que nunca, y los beneficiaos del sistema tán supercontentos de recuperar les cotes de gastu d'antes, tornamos ser consumiores gastizos sin mollera y sin consuelu, como drogadictos incapaces d'enfrentase al problema que mos destruye.
Felicito a los responsables del Ayuntamientu lavianés por esta acción coles luces navideñes. Prestaríame que fuese por cuestión medioambiental, qu'esti Ayuntamientu enarbolase la bandera de stop, alto, basta d'esta carrera llocos al abismu. Ya que ningún políticu relevante quier abanderar la causa que mos pue llibrar del desastre, tendrán que ser los alcaldes quienes lo fagan: p'algo l'Ayuntamientu ye la institución política más arrimá al pueblu. Prestaríame que fuese el nuestru alcalde'l qu'así lo ficiese, porque en pocu tiempu diben axuntáse-y munchos, y podría tar orgullosu d'haber fecho por toos los qu'habitamos esti planeta algo verdaeramente positivo.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo