Güeyando a Meloni
Nunca fui a pescanciar por qué, en xeneral, se güeya a Italia con una cierta altiveza dende esti llau de la oriella mediterránea. Faltu de los estudios sociolóxicos necesarios inclinome a pensar que nello se sofita dalgún atavismu de nueso, de cuando los Tercios campaben a lo llargo y ancho de la Bota, dende Sicilia al Milanesáu, pasando pela Campania, Toscana y la Lliguria. Ye lo qu’hai.
El casu ye que nun hai motivu real pa esa sobestima, al contrariu, Italia, país fundador de la Xunión qu’anguaño conocemos, y magar too esfrutamos, perdedor de dos Guerres Mundiales, sepo salir d’elles colos vencedores, y “envizcar” una última posguerra almirable que la llevó a ser una de les campeones del resurdir européu, en tolos sentíos; tamién a crear una república, de resortes alambicaos según la tradición florentina, que, magar too, ehí sigue, p’almiración y referente de toos.
Estos díes postreros tuvimos noticia d’un fechu, cinco encadenaos, con poca resonancia nel nuesu país pero que mos señala’l pesu anguaño, y lo que ye más importante, futuru, de la señora Meloni. Entamó’l sainete cola detención en Roma, a petición yanqui, d’un inxenieru militar iraní guetáu nos USA; a ello contestaron los ayatolas cola detención y encarcelamientu d’una periodista italiana; siguió unos díes más tarde la visita sorpresa a Mar-a-Lago, la residencia del César nuevu en Florida, por parte de Giorgia; el capítulu siguiente fo la lliberación de la periodista, con tantu de recibimientu ya imáxes esultantes n’Italia; acabando la historia cola suelta del iraní ensin que los yanquis protestaran, ¿garrenlo?
Meloni ye nesti momentu’l líder européu con mayor capacidá d’interlocución global, nel Mediterránéu mui penrriba de la Francia deprimida, la Gran Bretaña despaecida, o la España arrodillada; n’Hispanoamérica col Milei emerxente; colos países árabes nun tien problema; el so antieuropeísmu eleutoral va yá tiempu que ye historia y güei la “so” Italia rescampla percima d’un exe francu-alemán n’hores baxes, baxísimes tomaos dambos individualmente. El so “fráxil” gobiernu tripartitu paez aguantar escontra vientos, predicciones agoreres y encuestes sospechoses.
El lunes viniente, probablemente, va tar presente en Washington como invitada personal de Donald Trump, detalle anecdóticu pero importante, y, nel enfrentamientu arancelariu col que vien menaciando’l mandatariu nuevu, tamién nel enfoque sobro la invasión rusa n’Ucrania, puede qu’ella seya l’únicu interlocutor de pesu col que cuente Europa, con llarpiar de dientes d’algunos.
Yá que tal, ¿acuérdense vustedes d’aquellos dos infelices vascos deteníos por Maduro? Podemos unviar a Aldama a solucionalo, o entrugar a Meloni cómo se fae. Pues eso.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo