Conmoción y medrana
Ye un títulu qu'impón cola so sola pronunciación, y aínda más si se fae n'inglés, llingua de los sos diseñadores, Ullman y Wade, dos investigadores/politólogos de la Universidá de la Defensa de los EE XX que la desendolcaron nel 1996. "Shock and Awe", la doctrina militar que, al paecer, fo emplegada polos exércitos yanquis n'Iraq nel 2003.
Como doctrina militar tien esplicadura fácil y gráfica; trátase d'entamar golpiando cola durez másima, de forma que'l nemigu quede conmocionáu ya incapacitáu pa reaccionar con coherencia y eficacia. Podría pensase que naquel conflictu la teoría funcionó abondo bien, dando como resultáu l'esbarrumbamientu del Exércitu de Sadam Hussein, si bien la xestión política posterior fo un desastre completu, y el país aínda nun se tien recuperao dende entóncenes. Ye lo qu'hai.
Sirva esti esordiu digresivu pa encuadrar la soflama -nun sé si como pieza d'oratoria merez llamalu discursu- que l'otru día mos brindó a toos, a tol mundiu mundial, el renováu César norteamericanu. Un espiche/speech -neoloxismu que me permito n'homenaxe al recién nomamientu de la sidra asturiana como Patrimoniu Inmaterial de la Humanidá- que debió de dexar a munchos conmocionaos y llenos de medrana, y que llueu confirmaría cola robra en llugares estremaos de lo qu'adelantó nesa alocución enllena de mieu.
Paez nidio que'l petroleu, y tolo qu'ello conlleva, debería baxar en cuanto los yanquis se pongan a furacar per tol país, dalgo qu'a toos mos alegra, tamién que l'eléctricu va entrar, d'alguna miente, n'aplazamientu; el restu, incluyendo lo de la emigración, vamos tomalo con aselu, viendo los resultaos probes de la so primer presidencia, y, lo que ye más importante, la dependencia yanqui del trabayu de los emigrantes, como equí.
Más interesante ye ver cómo'l restu del mundiu se pon de perfil y calla, esperando a pescanciar haza ónde apunten les armes norteamericanes, les económiques y eses de fueu que tamién tien prometío reforciar Donald Trump. Y ye que naide quier ser oxetu de la roxura o, simplemente, l'interés del César mundial nuevu. Nin siquier Xi Jinping, y muncho menos Vladimir Putin, al que'l plazu nuevu pa solucionar lo d'Ucrania, seis meses, nun-y tien debío facer gracia, cola economía del so país a puntu d'implosionar a cuenta de la so dexastrosa Operación Especial.
Lo d'ayeri fo una actuación, mui bien montada, por cierto, y agora va haber que dir estudiando los pasos vinientes, y, no que mos toca a los españoles, aceutar que col nuesu Gobiernu nun ye que temos bien posicionaos p'asumir la conmoción, pero, a lo menos, nun mos asustemos.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo