La doctrina ñueva norteamericana
Ta ferviendo la pota de la Defensa europea; y ye que, dende la Invasión d'Ucrania, asina con mayúscules, too paez tener camudao pa nós, los europeos. Ye como si Putin mos recordara que'l "mundiu feliz" de Huxley nun yera más qu'una ficción, y el nuesu tamién. Y nun reaccionamos mal del too, non; quiciabes pela cercanía, pero, per primer vegada, Europa paez que se tien despertao del apigazamientu duce que dan les dixestiones pesaes; como si daquien-y diera una pescozada metanes la cabezada. Ye lo qu'hai.
Les sanciones a Rusia y el sofitu, con mayor o menor enerxía según los casos individuales, d'Europa y la mayor parte de los sos componentes suponen un rayu d'esperanza nun futuru que, por definición inciertu, paez presentase con más ñublaos de los que mos prestaría. Y ye que mos vamos quedando atrás en casi too, sacantes nos avanzos sociales, que si nun curiamos el restu, van desapaecer, y de sópitu posiblemente.
La movida de la intelixencia artificial, na qu'Europa nun pinta un res, ye una amuesa, pero'l terremotu Trump na Xeopolítica y la Defensa van suponer un partaugues pa toos nós, porque más allá del farfán nomáu pa la Secretaría de Defensa, presentador televisivu, borrachu y depredador sesual, pero con esperiencia de combate, el restu de nomamientos tienen un fustaxe induldable, entamando por Michael Waltz, el conseyeru nacional de Seguridá, congresista definíu como un ferre tocantes a China, y coronel con un pasáu como boina verde con experiencia múltiple de combate: Afganistán, Oriente Mediu, etc., y distintes condecoraciones.
Per ú van dir los tiros puédese albidrar nun llibru de 2021, "The Strategy of Denial", de Elbridge A. Colby, quien va ser, tres esame del Senáu, el secretariu de Política de Defensa nuevu, y llega con currículu estensu nestes lides, les de la direición política de la Defensa USA. Y nesa estratexa defínese la voluntá de piesllar el pasu, "Denial", a China na so área rexonal, esto ye, nel Pacíficu oriental, con una actitú belixerante, más allá de la disuasiva que yá Obama punxera en marcha. Y tien implicaciones.
Eso cuesta perres, porque hai que potenciar la Marina y l'Aire, en desterciu del Exércitu, que va ver amenorgar la so dimensión y medios, especialmente n'Europa, au s'espera que los Aliaos, OTAN, Europa, pongan la so parte; esi 5% PIB que señala l'ogru anaranxáu. Dalgo que nun paez alteriar al nuesu presidente, que promete el 2% pal 2029. Tenemos un problema.
China ye yá l'enemigu de Washington, y cualquier lloria d'averamientu a ella vamos pagala. Convién que tomemos nota del aprendizaxe que'l colombianu Gustavo Petro mos brindó.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo