Los dos exércitos d'España
Esta selmana un par de noticies tiénenme llevao a recordar un fechu profesional vieyu. La ocasión, nun destín esterior, diose demientres un café distendíu ente collacios, en presencia del xefe, nel que yo tevi la ideya desafortunada de manifestar que n'España esistíen dos exércitos, el de provincies y el de Madrid, lo que provocó la furia del xefe, perteneciente, acordies el mío criteriu y confirmao pola so reacción, al grupu segundu. Aparentemente el sangüe nun llegó al ríu, pero esi añu fui agasayáu con unes calificaciones añales nidiamente meyorables, pero que nun moderaron la mío incontinencia verbal. Ye lo qu'hai.
Si dalgún llector s'entruga en qué consiste eso de los dos exércitos yo recomendaría-y lleese los "Episodios Nacionales" de Galdós, nos que describe perfeutamente lo que son les covachueles del poder capitalinu, na so vertiente civil y militar; y pola parte provinciana les figures d'Espartero, el xeneral del caballu pernomáu, y Prim, asesináu, ensin qu'entá nun se sepa por quién, quiciabes por nun saber xugar al xuego eternu madrilanu.
El caso ye que, como señalaba, esta selmana, mediu escabildao en dalgunos medios, dábase cuenta de l'autorización de Defensa pa que tres altos mandos, desconozo la so identidá, pudieran trabayar con Indra como asesores, o lo que ye lo mesmo, como consiguidores a cuenta de los sos contautos pasaos nos medios capitalinos del ramu. Y ello ye llegal, nun vayan a pensar vustedes otra cosa. Ye lo que llamen lobbying en Bruxeles.
La otra noticia daba cuenta de los 103.000 euros añales que va cobrar el xeneral Gan pol so desempeñu como vicepresidente en Valencia, lo que motivó l'espelleye del antedichu por voceros del nuesu partíu populista conservador, na so vertiente valenciana; el talibán más nomáu de la nuesa radiofonía, que paez guarda-y una rancura especial al xeneral, y la delegada del Gobiernu, d'ingresos oficiales mayores que'l propiu vicepresidente, supongo que pola so preparación estraordinaria y contrastada pal cargu, dalgo que la afeutada debe considerar natural.
Y ye que 103 menos un 46% de IRPF, en 14 pagues y teniendo que pagase un aloxamientu dignu en Valencia, a dalgunos paez-yos una barbaridá. Quiciabes el revuelu xustificase porque'l xeneral ye de provincies, y nun sabe cómo se xuega al xuegu capitalinu, yá que cuando fo alistáu por Mazón manifestó como razón fondamental pa la so disponibilidá el "servir a España", figúrense vustedes. A lo que añedió, dalgún tiempu dempués aquel adaxu, incomprensible pa munchos, de "nin pedir nin rehusar".
Nu tamos énte un hiviernu nuclear, pero ente Putin y Trump paecen anunciar tiempos d'afliximientu pa Europa, y vamos escarsos de militares de provincies.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo