La hora 25 d'Europa
A dalgunos, el títulu sonará-yos a programa de radio, pero'l conceutu naz con una novela de calter parcialmente autobiográficu qu'escribió un rumanu, Constantin Gheorghiu, tres los avatares de la Segunda Guerra Mundial; "La hora venticinco", na que sufre padecimientos tremendos, y que va servir pa qu'Anthony Quinn se luzca con un papel protagónicu na película del mesmu títulu.
El mensax qu'aporta ye que nesa hora la humanidá pierde toa esperanza, porque too s'esbarrumba, non namái les estructures físiques, qu'a la fin y al cabu son recuperables, sinón los principios y los valires, el conceutu mesmu d'humanidá desapaez, como asocedió n'Europa coles atrocidaes que traxo'l nazismu, y qu'en delles zones foron respondíes pol comunismu estalinista.
Nestos díes atopámonos los europeos con una sensación, en ciertu mou, semeyante a la que la novela mos representaba. Aquello que creyíemos sólido, casi inmutable, como yera'l sistema de seguridá que los Aliaos, lideraos polos Estados Xuníos, punxeron en pie tres los desastres de la guerra, y que mos tienen caltenío, demientres más de setenta años, confiaos en que la tranquilidá de les nueses vides nun se vería alterada nel interior de les nueses fronteres, especialmente tres la desapaición del Muru de Berlín y el Pactu de Varsovia, vemos agora que nun yera más qu'un trampantoxu, tres el cualu en realidá nun había más qu'una pared desnuda, fría y fea.
El güelpe tien sío mayor porque, con cifres na mano, Europa tien echao'l restu na ayuda a Ucrania, penriba de los EE XX, nel convencimientu de facer lo correutu doblemente; por sofitar al débil énte la invasión inxustificable del poderosu, que se saltaba toles normes del drechu internacional, y amás defendíase a sí mesma énte la posibilidá, casi certidume, de que nun futuru la menacia s'estienda haza l'oeste si non se para a tiempu. Y too ello cola anuencia y el sofitu del líder de l'Alianza, los EE XX.
Agora tolos nuesos presupuestos esmoreciéronse cuando comprobamos que'l rei non namái ta desnudu sinón que ye una especie de reencarnación de Calígula, por citar ún de los emperadores alloriaos de la vieya Roma, qu'únvia a la papelera tolos alcuerdos previos, posiblemente, en dalguna forma, tamién la propia Alianza, lo que mos obliga a tomar decisiones, rápidamente, radicales, como si la menacia fuera direuta, que lo ye. Decisiones como si Europa fuera un Estáu unitariu, decisiones qu'únvien un mensaxe fuerte, al nuesu vieyu lídery a Rusia. Decisiones como si tuviéremos énte la hora venticinco.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo