El chaquetón cruzáu
Esta mañana tevi un reblicón al pasáu, como de cutiu-y asocede al mío amigu Emilio cuando paseya peles cais de Lugo, eso que nes pelis llamen flash back. Salía yo de la mío pastelería habitual, o debería meyor conseñar como semanal, puestu que namái entro los domingos a comprame una breva espectacular enllena de crema, y ello porque'l colesterol nun me da pa más, cuando, al cruzar el semáforu, cruzeme -almítanme la redundancia, qu'aína vien otra- con un tipu de la mío quinta, esto ye, un güelu decrépitu, lluciendo un chaquetón de pañu gris cruzáu. Y les alcordances golpiáronme, quiciabes abofetaron, que ye más llevaderu a la mío edá, colos mío dos chaquetones cruzaos de pañu azul.
Y ye que sí, yo tevi non unu, sinon dos, por aquello del crecimientu, porque'l primer, nun teniendo constancia documental, creo que debo datalu no qu'anguaño llamen pre-adolescencia, dómina de paes y duldes -atrévome a apuntar esta procacidá porque anueche tevi güeyando la Malena de Tornatore n'un d'esos canales que vienen col paquete audiovisual habitual- y el segundu, yá no qu'entoncenes llamaben el bachiller superior, y qu'aínda me llegó pa entamar la mío tapa d'opositor fuera de casa, en provincies tan llonxanes como la ventolera Zaragoza.
Los mío chaquetones llegaben de mui cerque de casa, de la cai Artillería del xixonés barriu de Cimavilla, al llau de la Comandancia de Marina, au agora esiste un edificiu d'apartamentos, y nos sos baxos, cara al muelle y con fortuna desigual, intenten sobrevivir apuestes gastronómiques estremaes, con discurrir inciertu pel momentu; y a min fueme mui bien con ellos; abrigabenme, y, permítanme'l desahogu, quedabenme mui bien dao la mío figura espodada, y tamién la edá. Ye lo qu'hai.
Esto cabero, dalgún va poder pensar que ye autobombu, pero non, ye un amestao d'alcordances, yá que col segundu salía de la mío casa cuando algamaba los mío ésitos primeros coles moces, o lo que yo valoraba como talo, dalgo mui estrinxíu, toi seguru, comparao cola valoración que los adolescentes anguaño van facer del mesmu asuntu, y tamién pola apreciadura del paisanu col que me crucé nel cruce citáu. Y ye que, señores, quedaba-y bien, magar el gris, y eso, a según qué edaes, nun se puede atribuyir a la prestancia personal, sinon a les ayudes, como la que-y otorgaba esi estupendo chaquetón cruzáu de pañu gris.
Col chaquetón, el segundu, aporté a Zaragoza, anque l'internáu malapenes me dexó oportunidá pa lucilo, pero yera una muralla énte'l cierzu, como'l d'esta mañana, y gustaríame pensar que torna a tar de moda, anque la edá del portador nun lo abarruntaba.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo