Barraganes
Esti añu'l Día de la Muyer tien quedao un pocoñín esllucíu. Los llovíos cayíos en casi tol país, en dalgunos casos casi torrenciales, obligaron a tol mundiu a abellugase baxo paragues ya impermeables, lo que dio como resultáu unes imáxenes poco curioses pa la prensa gráfica y televisiones, pero, amás d'ello, les noticies que los políticos "progresistes" foron produciendo los meses caberos contribuyeron ensin dulda al desencantu y alloñamientu de munchos de los participantes d'otros tiempos.
La esquierda nueva, y tamién la de siempres, vino usando'l discursu de la muyer como un arma refundiza escontra los sos alversarios políticos, la drechona, ensin dase cuenta de qu'esi ye un tarrén abondo esbaraízu, el mundiu traicioneru de la política, nel que cualquier tropiezu puede llevar a la ruina de los protagonistes, y en parte tamién de les formaciones de les que formen parte.
L'añu tien sío abondosu n'acontecimientos indecentes, y el tiempu va dicir si tamién delictivos; pero quiciabes lo más estupefaciente fuera'l saber que'l poderosu númberu dos del Partíu Socialista y ministru de Tresportes, l'home qu'estenó les duldes de Pedro Sánchez tres la so pérdida inicial de la secretaría socialista, caltuvo non una, sinón delles barraganes, con fondos d'orixe duldosu pel momentu, anque yá dalgún xuez trata de poner lluz sobro la so procedencia.
Per esti llargu camín del Día de la Muyer, que tien dío reduciendo al mínimu les celebraciones tradicionales de Santa Águeda, de raigañu relixosu y poro refugables, foron cayendo otres víctimes, particularmente les formaciones clásiques feministes, arrequexaes, si non espulsaes, de los grandes movimientos, a favor de lo trans, queer y demás tipoloxíes, que práuticamente atropen tolo rellacionao coles ideoloxíes polítiques más esquierdistes.
Llovía tamién en Barcelona anueche, ellí siempres busquen otres feches pa casi too, por aquello de la diferenciación, mientes una marcha muncho menos concurrida que nel pasáu oyía glayar dende dalgún balcón los nomes d'Errejón, Monedero y Ábalos pa escarniu de los participantes; y en Xixón, dícenme, esta mañana'l desfile presidíalu una parodia de Santina queer, entemeciendo, una vegada más, lo relixoso y lo político ensin respetu a les creyencies de la mayoría, dalgo que nun asocede, por exemplu, coles creyencies musulmanes. Ye lo qu'hai, astracanaes.
El casu ye que, tomando'l referente Ábalos, númberu dos del negociu socialista, convién nun escaecelo, paez lóxico pensar qu'eses barraganes que caltenía a lo llargo del tiempu danmos una pista de la realidá que puede nascondese tres los discursos y guapes pallabres de los nuesos líderes, una realidá tan fea como cabía esperar.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo