El Jack Ryan de Robert Kaplan
El primer va-yos sonar a la mayoría. Ye un personaxe de ficción creáu por Tom Clancy, que lu desarrolla a lo llargo d'una veintena de noveles d'aición nes que son les operaciones más o menos tapaes de la CIA la fonderada nel que too se desendolca. Nelles, el nuesu protagonista, vieyu oficial de los Marines, ye un analista especialista en transacciones bancaries, pero que, llegáu'l casu, ye a embarcase naquel "Ochobre Colloráu" que patroneaba un, como siempres, persólidu Sean Connery, p'acabar resolviendo situaciones susceptibles de poner en peligru l'Imperiu norteamericanu.
El personaxe, con cierta frecuencia, apela a la so condición d'analista simple, pero acompañándolu nos sos desplazamientos, montaos nes llínees apasionantes de Clancy, podemos percibir la infraestructura descomanada de medios y personal que sofita l'aición política esterior de los Estaos Xuníos. Porque la xestión d'un imperiu ye complicada y costosa; fuelo pa Ciro'l Grande, fuelo p'Augusto, tamién pa Carlos V, y menos pa los británicos, pola so habilidá pa esplotar persones y territorios. Ye lo qu'hai.
Robert Kaplan ye menos conocíu. Autor celebráu de llibros nos que combina almirablemente viaxes ya historia, tien sío tamién sosecretariu d'Estáu en Washington con Bill Clinton, quien, tres la llectura del so "Fantasmes de los Balcanes", decidió la implicación de los EE XX nel conflictu de Bosnia i Hercegovina. Pa min ye la de so una de les opiniones a tener en cuenta en cuestiones de xeopolítica, y poro trato de siguilu nos medios nos qu'escribe.
Estos díes tien espublizáu en "Politico Magazine" un artículu nel qu'afirma que Donald Trump nun sabe xestionar un imperiu, lo cualo deduz de los recortes que piensa llevar a cabo, dalgunos yá en marcha, en munches, si non en toes, les axencies del Gobiernu de los EE XX. Axencies de tou tipu, dende la seguridá, l'análisis o l'ayuda humanitaria, como USAID, que los sos sacos d'arroz o trigu tenemos visto a lo llargo de los años en requexos múltiples del mundiu, y que lo primer que t'entruguen pa sofitate un proyeutu ye: "¿En qué beneficia al Gobiernu de los EE XX o a los sos oficiales?".
Toos esos homes y muyeres repartíos pel mundiu desarrollando les sos funciones sacupen informes que van servir pa crear intelixencia y soportar los dosieres y espedientes que más tarde van ayudar a los altos oficiales norteamericanos a tomar les decisiones que facen qu'una potencia seya dalgo más qu'eso.
Imperiu supón capacidá y voluntá, les que fai un sieglu caltienen los EE XX. Rusia tien la segunda, pero fálta-y la primera; y China construye les dos mui rápidamente.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo