El créditu, la opinión
Tengo d'afirmar, d'entrada, que nunca tien sío daquién que m'inspirara enfotu, si bien esi nunca entama cola noticia d'aquella urna escondida tres unes cortines naquel congresu balasmosu que los socialistes montaron pa escoyer al sucesor de Rubalcaba. Yera un mal aniciu, y facía pensar que, tres el so serendén, escondíase un tipu peligrosu. Pero con too y con ello, primero los sos correlixionarios y dempués un númberu abondo d'españoles, alzáronlu a la más alta maxistratura de la nación, tres el Rei. Y nello tamos.
Col sofocón del apagón, y nun quiero facer canción, el nuesu presidente tienmos dao, una vegada más, amuesa de les sos capacidaes histrióniques pa camudar la realidá según los sos gustos, o meyor, les sos necesidaes. Y ayeri, tres les dos intervenciones tardíes y vacíes del día de la dómina preindustrial que veníemos de sofrir, obsequiómos con una apaición nueva na que, aparte d'echar balones fuera, mui fuera, de la contorna de la so responsabilidá, centrándose nesa "oscilación enerxética" de la que culpa ensin pruebes a "operadores privaos" ignotos, nun aportó un res que mos pueda aselar a los españoles, nin no técnico, nin no político.
Qué tiempos aquellos de la gota fría, va pensar dalgún, pues dempués vieno la cicloxénesis esplosiva, la dana, y agora esta oscilación enerxética maldita, p'amestar a les nueses medranes d'adultos, camudando aquel simple home del sacu de les nueses velees infantiles. Agora too ye más cenciello, y complicao cuando falla la tecnoloxía, como esi taxista madrilanu qu'ensin GPS nun sabe aportar a la M-30. Ye lo qu'hai.
A min, oyendo al doctor Sánchez, veníenme los versos que Calderón dedicó al soldáu español na so comedia "El Sitiu de Breda", nos que describe perfeutamente la condición humana de la piedra angular de la construcción del Imperiu español, "... la cortesía, el bon tratu, la verdá, la firmeza, la llealtá, l'honor, la bizarría, el créditu, la opinión, la costancia, la pacencia, la humildá y la obediencia; fama, honor y vida son...", y analizando eses carauterístiques d'aquel soldáu de los Tercios concluyo que namái la costancia paez adornar el pechu del responsable de la nuesa política en xeneral, y la de defensa en particular.
Son tantes les mentires, agora conocíes como cambéu d'opinión, que, tengo pa min, la mayoría de los españoles, a lo menos aquellos mínimamente racionales, tienen algamao'l nivel de fartura. Per toos llaos el trampantoxu políticu nel que se tien instalao Sánchez paez esbarrumbase, y unu nun puede por menos que sentise enraxonáu énte tantu aprobiu y sinvergoncería, pues, queramos o non, él ye'l presidente de nueso.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo