El municipalismu y los partíos nacionales
Tengo pasao, por razones profesionales, la mayor parte de la mio vida fora d'Asturies; n'España y en varios países foriatos, pero siempres ensin dexar d'exercer de playu allá au y cuando tenía oportunidá. Como anécdota queda'l fechu de que'l mio primer cachopu degustélu va dellos años na Casa España de Santo Domingo, y nun m'emocionó como ensin dulda lo ficiera un pulpu con patatines. Ye lo qu'hai.
Magar esa distancia nunca tengo dexao de siguir los avatares, particularmente los políticos, de la mio ciudá, Xixón, na qu'agora, a la fin, atópome casi establecíu; y ente esto, la mio esperiencia vital y la imaxe que la prensa de tou tipu mos tresllada, el mio desánimu, dicen qu'inherente al avanzar de la edá, nun dexa d'amontar.
Y ye que, dende aquellos años gloriosos en que la naval, la siderurxa y la minería marchaben a tou trapu, la nuesa rexón y ciudá nun tienen dexao de cayer en casi tolos sentíos, particularmente nel llaboral, pero tamién en xeneral. Y como amuesa namái hai que dase un paséu pel centru de la ciudá y contabilizar el númberu de llocales que s'atopen piesllaos y con poca o nula posibilidá de reabrir.
N'Asturies namái paez dir-ye-y bien a Uviéu, siempres aposentada na so privilexada capitalidá, que por sí sola promueve empléu de calidad y en cantidá, mientes el restu, especialmente les ales, pero Xixón y Avilés tamién, ven cómo hai que tar al interés de quien gobierne nel Principáu, col sofitu de Madrid, según quien s'alcuentre nunu u otru llugar.
Agora en Xixón cuntamos con un gobiernu que podríemos calificar como llocal pola so escasa implantación fora de la villa de Xovellanos. Un gobiernu de coalición nel que'l so partíu principal esfuérciase, aparentemente, en desarrollar la ciudad -va-y el futuru nello- y atópase con, llamémosles asina, circunstancies alverses que vienen de la mano de quien gobierna n'Uviéu o en Madrid, como amuesen los retrasos nel Hospital de Cabueñes o'l túnel d'accesu al Musel, ensin nomar otres histories que tamién tán ehí.
La cabera, que tien concitao la unanimidá del restu de fuercies polítiques, vien del troléu que l'Autoridá Portuaria, gubernamental, quier monta-y al Ayuntamientu a cuenta de los tarrenos de Naval; un proyeutu acordáu y robláu, que ta llamáu a impulsar el siempres desfavorecíu Natahoyo, y de pasu casi rematar la siempres pendiente fachada marítima xixonesa.
Enquivóquense Madrid y Uviéu, y vanlo notar cuando haya que votar en Xixón, yá lo verán, anque yá va ser tarde.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo