El golf, esi desconocíu
Va dellos díes tuvimos de competición. El campeonatu anual de golf de la promoción, que dicho asina paez dalgo de ciertu valumbu pero que, en realidá, nun contó con abondos participantes como pa llegar a la media docena. Y eso que yá llevamos dellos años col enfotu de qu'acabe siendo una tradición, anque seya nel cementeriu, dada la edá avanzada de los participantes.
Y ye que'l golf, ente los miembros del Exércitu de Tierra, nunca tien sío una actividá habitual. A nós paez que mos va más lo tradicional: la carrera continua, agora nomada running; los xuegos d'equipu tipu balonmano o semeyantes, y nos tiempos caberos la bicicleta de montaña, que combinada coles carreres d'orientación da resultaos espectaculares pal interés del nuesu oficiu.
Aviadores y marinos cuntaron, dende qu'Eisenhower visitó España, con bases aérees y navales, nes que se construyeron campos de golf, y poro los nuesos colegas tán más avezaos. Porque, magar esa fama d'elitismo, cola que nin siquier la figura de Ballesteros llogró terminar, el golf ye un deporte interesante enforma pal oficiu de les armes; tantu qu'en Corea del Sur va tiempu que ye deporte militar, por aquello de la coordinación, control d'emociones y concentración. Y ehí tamos.
A min la primer vegada que me llegó noticia del golf fo en Barbastro, va yá dellos años, nel vieyu "Valladolid 65", anguaño desapaecíu. Descubrimos qu'un compañeru, oficial de montaña, xugaba al golf, dalgo qu'él caltenía en prudente secretu, y que-y valió invectives varies, de calter homofóbicu, que güei cuantu menos sedríen consideraes como mui inconvenientes, y cuantu más, quiciabes, motivu d'una querella. Pero como'l fondu, que non la forma, yera cariñosu, la cosa nun llegó a mayores.
Dempués, bastante dempués, atopéme en Cuba en llabores cuasi diplomátiques, nes que'l golf podía ser un preséu más pal mio trabayu, y a ello me dediqué cola pasión que mos inculcaron na Xeneral, como'l mio amigu Xosé Lluis, coles mesmes necesidaes que yo, pero n'El Cairu. Y meyores resultaos na xestión d'esta actividá qu'esti escribidor.
Lo del otru día fo un combate como los de los vieyos tiempos, nel aneyu campu yanqui de la Base Aérea zaragozana, solmenaos con un cierzu tayante que venía adicionalmente refrescáu pola nieve recién del Moncayu. Y qu'anque namái fuera poro, el cierzu fízonos sentir mozos demientes unes hores; les previes a una xinta con otros collacios veníos a festexar, y regao con un bon vinu de Somontano, como cumplía al llugar. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo