Nun la mató'l maríu
La noticia diz lo contrario del títulu desta tribuna pero, a vegaes, nun hai que quedase nes lletres gordes de les informaciones y convien, o inclusive ye obligao, tratar de pescanciar qué ye lo qu'hai detrás de dalgunes traxedies, como l'asocedía en Llaviana.
Y ye que, cuando un vieyu mata a la so pareya, tamién vieya, y aparentemente nada facía abarruntar talu desenllaz pa toa una vida de serenidá pacetible, por fuerza tienen d'esistir matices qu'espliquen el drama más alló de la violencia de xéneru simple, que ye como va pasar a cuntar esti asocedío tarrecible. Pero non.
A esta muyer nun la mató l'home. El namái fo'l preséu desencadenante d'una situación que s'esplica dende'l fracasu de toa una sociedá que s'enllena la boca, o los boletines oficiales, con grandes lleis y declaraciones, como lo ye la llei de Dependencia, sacada de la manga por un Zapatero que, como'l so socesor anguaño nel Gobiernu y nel partíu, fo maestru na prestidixitación política. Una llei que yá entóncenes, na so nacencia, nun cuntaba col necesariu soporte económicu, como actualmente asocede cola de la ELA, y que dexa a munchos tiraos na cuneta d'una sociedá que se diz moderna y opulenta. Pa dalgunos.
La estructura social contemporánea, con innumberables tipos de familia ñuevos que arrequexen, casi persiguen, a la patriarcal clásica, dan como resultáu, en dalgunos aspeutos, que les vieyes redes de sofitu desapaezan o, nel meyor de los casos, se faigan más débiles, casi inesistentes. A ello améstense los usos económicos ñuevos que obliguen en munchos casos a la rotura indeseada de los llazos familiares. Ye lo qu'hai, van dicir dalgunos, pero'l resultáu, col acompañamientu del amontar de la espectativa vital, podémoslu güeyar n'ancianos desarraigaos na so soledá o na so incapacidá pa xestionar el deterioru físicu del compañeru de vida.
La muyer del vieyu d'ayeri tenía un deterioru cognitivu fonderu, dicen, y el so maríu, con un fíu en tierres llonxanes y 90 años al llombu, nun se sentía capaz de xestionar una situación que dio como resultáu la muerte d'ella, y que nunos pocos díes nun va ser más qu'una cifra nesa violencia de xéneru que, nesta ocasión, y na mio opinión, escuende'l fracasu d'una sociedá que xenera lexones d'ancianos pero que, al mesmu tiempu, ye incapaz de da-yos unos años caberos en paz y en seguridá.
El problema n'Asturies, una de les rexones más avieyaes d'España, ye como un iceberg, del qu'en superficie nun apaez más qu'un octavu del so valume total.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo