D'equí nun se mueve nin dios!
El tiempu cuerre inesorable, y el calendariu canta que yá tienen pasao treinta años de la conocía como Masacre de Sbrenica, quiciabes la más bederre de les munches que se perpetraron na guerra de Bosnia. Más d'ocho mil varones bosníacos fusilaos inmisericordemente poles fuercies serbies del xeneral Ratko Mladic, un psicópata con mandu qu'anguaño se podre na cárcel de La Haya tres la so conderga a cadena perpetua.
Nós, los de l'Agrupación española de tropes de montaña, aportamos un par de meses más tarde al país, cuando entamaben a filtrase les noticies de la matanza, dalgo que nun convenía a los serbios, nin tampocu a Naciones Xuníes, teóricu responsable de la seguridá d'aquella bolsa que encomendara a una esigua fuercia de cascos azules holandeses. Pero ocho mil muertos son munchos muertos pa esconder.
Los holandeses, espertos n'ocupar puestos na OTAN y nel DPKO, el departamentu de misiones de paz de la ONU, son unos militares sui-xéneris, como lo ye'l so país, siempres a la tiesta nos avanzos sociales más estremos, que se suponen vienen de la manu del progresu de la sociedá, anque pa dalgunos l'asuntu nun acabe de tar nidio. El caso ye que, no militar, son daos al chalanéu, a lo menos en Sbrenica fuéronlo, y tres tragar saliva y unos vasos de rakia col verdugu, salieron pitando. L'asuntu supunxo la dimisión del gobiernu en plenu n'Ámsterdam. Eso asocedió cuando los gobiernos aínda teníen vergoña.
Un par d'años enantes, en Konjic, rio Neretva arriba, y aniciu del puertu de montaña que daba accesu a la entóncenes asediada Saraxevo, un teniente de la Lexón, con treinta de los de so, vióse metíu nun fregáu inesperáu, con doscientos croatas, soldaos, muyeres y neños, perseguíos por un fuerte continxente de paramilitares musulmanes, con fama de sanguinarios y qu'esixíen la so entrega, una vegada que los primeros s'acoyeron a la so bandiera, tres entregar les armes.
El teniente, Monterde d'apellíu, paecía tenelo más nidio que los sos propios mandos, colos que caltenía enllaz radio, y tres ordenar cargar y apuntar les armes a los de so y dici-yos: "D'equí nun se mueve nin dios", explicó-yos a los islamistes que si atacaben faríenlo escontra les fuercies internacionales, colo qu'eso suponía -la verdad que entós non muncho-, y tres doce hores de tensión los barbudos replegáronse haza la so zona d'aición coles manes vacíes.
Los soldaos españoles, esos que la ministra Robles ofrez a la OTAN a cambiu de un 2,1% del PIB, "namái non sufren que-yos falen alto", Calderón dixit, y a mín, ya que nesti aniversariu nun se puede homenaxar a aquellos oranxistes, el cuerpu pidíame facelo con Monterde y los sos lexíes.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo