Circunspección
El paisanu del momentu en Nueva York la selmana pasada foi Ahmed al-Sharaa, enantes Muhamad al-Golani, demientres el so liderazgu del Frente al Nusra, el sangrín grupu terrorista de los tiempos del ISIS. El mozu, nacíu y criáu nos Altos del Golán, socupaos dende va yá abondo d'años por Israel, emigró a Iraq, pa ellí ser amamantáu, ideolóxicamente, por aquel califa tarrecible ya efímeru, Abu Bakr al-Bagdadi, creador del Estáu Islámico tres independizase de la odiosa Al Qaeda, a la que fizo paecer benéfica per momentos; tales foron les sos atrocidaes.
El casu ye que, cuando'l caberu de los al-Asad entamó a perder el control en Siria, al-Bagdadi unvió a un de los sos pupilos meyores pa crear una franquicia ellí; el DAESH/ISIS. Esti foi al-Golani, quien en cuantu algamó un cierto control, siguió la sienda del su mentor y traesformó la franquicia na independiente Frente al-Nusra, que se diba convertir na facción principal de les munches que se crearon y enfrentaron al gobiernu de al-Asad, yá col nome de Hayat Tahrir al-Sham, y que, cuando ésti cayó, rápidamente tomó'l control de la situación pa, escaeciendo los alcuerdos políticos previos de los grupos opositores, alzase en xefe del cotarru y reunviar les posibles eleiciones democrátiques pa un tiempu ignotu nel futuru.
Pol motivu que seya, probablemente los pozos de petróleu, que per agora controlen los Kurdos, o los varios oleoductos que l'atraviesan, o los posibles chantaxes migratorios, que tamién, el casu ye qu'Occidente entainóse pa abrazar al antiguu terrorista, del qu'en Redes campa una fotografía, que la so autenticidá ignoro, na que s'amuesa esultante con dos tiestes cortaes nos sos brazos. Ente ellos, los occidentales, España, gracies al nuesu Napoleonchu, que yá la visitó'l pasáu xineru. Non foi l'únicu.
Agora, col so discursu na ONU, nesa asambleya prestixosísima y decrépita, dalgo que dalu de los al-Asad algamó, tiénse convertío nel home de moda, y ellí, orellando les matances recien d'alauites, o cristianos, o la división del país n'árees d'influyencia y control de les estremaes milicies baxo la Sharia, atopóse con Giorgia Meloni, a la que nun-y va mal nel recorte de la inmigración que'l so gobiernu tien algamao, y tamién con Donald Trump, que los sos designios, como a la mayoría, escápenseme hasta agora. Y hasta equí, como diría un italianu, cazzi suoi, asuntu d'ellos, pero lo que me malvió l'ánimu tien sío la semeya del Rey con esti individuu, ofreciéndomos nel so semblante la espresión meyor de lo que ye la circunspección -seriedá, decoru y gravedá n'aiciones y pallabres-, pues ensin dulda, la encerrona del gobiernu guetaba enzancar la semeya del doctor Sánchez, y de pasu erosionar a la Corona. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo