Seronda de premiu Nobel
Tán los praos del Tragamón a primer hora de la mañana pa face-yos una semeya. La rosada cayía demientres la nueche, amestao colos baxos rayos de sol recortaos polos ablanos que llenden dalguna de les cais del campu, dexen una atmósfera única, cargada de solitú y que la buelga d'un únicu carru d'un xugador más madrugador paez encarregase de sorayar.
Más alló, al otru llau d'esi ríu Peña Francia, malapenes un regatu nestos díes de llovíos escarsos, faise difícil allugar la bola ente los munchos champiñones apaecíos últimamente y que naide recueye nesta Asturies de curtia cultura micolóxica; mui lloñe d'aquella Navarra au ye segunda relixón, anque con más practicantes que la primer. Ellí tol mundiu sabe de setes y fungos, nun hai medrana pa pañalos; equí, magar l'esfuerciu de delles sociedaes, nun tenemos tradición, y esi botín gastronómicu preciáu piérdese toles serondes nos nuesos praos, montes y viesques ensin que casi naide lu recueya. Ye lo qu'hai.
Na mio soledá, ente güelpe y fallu, dame tiempu a recordar l'aplausu, inmerecíu, que unes muyeres, siete creyo que yeren, me dieron nos Campinos, los antiguos Patos, antieri pela tarde, recién estrenáu'l Nobel de María Corina Machado. Elles taben ellí, subíes al pasiellu/pérgola que domina les augües qu'antaño abrigaben aquellos patos; coles sos banderes venezuelanes, y dalgo que paecíen altavoces pero que, cuando yo pasé, nun taben n'usu. Les terraces de la plaza taben atarraquitaes, pues l'atapecer casi braniegu daba pa ello, y a mín, que María Corina paezme una suerte de María Pita, o d'Agustina, diome por averame y dici-yos simplemente: "Norabona a María Corina y al pueblu de Venezuela", recibiendo l'inmerecíu pagu d'unos vivas y aplausos que ficieron que dalgunos tornaren la vista dende les terraces, anque dalu d'ellos s'averó.
Tán los venezuelanos de la diáspora, que son millones, col ánimu abondo cayío énte esa dictadura criminal y aborrecible que paez interminable, a la que'l nuesu Gobiernu, nos sos vaivenes en función de la problemática interna y los tratos escuros de Zapatero, trata con un procuru que namái xueces ya historiadores algamen quiciabes dalgún día a esplicamos, y esti premio a María Corina tien-yos dao un soplu d'esperanza, anque'l doctor Sánchez aínda nun tien atopáu tiempu pa felicitala -¿quiciabes porque ella trata con Abascal?- marcando una vegada más la distancia col restu d'Occidente, y con una, tamién silente, Casa Real, que poro me dexa ablucáu.
Más arriba, averao del Xardín Botánicu alcuentro un corru de boletus edulis, oportunidá perdía pa un risottu magníficu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo