Aquelarre diplomáticu n'Exipto
Dalgún va pensar que m'entepaso calificando aquello como un aconceyamientu de bruxes y hechiceros pa facer los sos encantexamientos, pero ¿acasu nun actúen como talos los nuesos políticos? Toos, en xeneral. ¿Nun resulten ser una especie d'embruxu les campañes polítiques? Con momentos cume na fase d'eleiciones y momentos puntuales el restu del tiempu. Y ye ehí, nesi aspeutu caberu, au encuadro lo d'antieri, col señor Trump como bruxu xefe del mundiu, o a lo menos de la parte qu'obedientemente-y facía los coros en Sharm-el-Sheik.
Un Trump pal que la democracia yanqui nun taba afitada, y al que nun pudo para-y los pies nesti asaltu segundu al tronu del mundiu. Una democracia, como por otra parte asocede coles demás, qu'amuesa que nun tien recursos pa defendese énte los conxuros de los bruxos del sieglu XXI. Y el resultáu puede que lo güeyaremos nesi show montáu pol ogru anaranxáu pa prestu d'un egu que nun paez tener llendes.
Él yera ellí, sobro l'astráu, el más altu, el más guapu, el más llistu, el más too. El restu, con un anfitrión golpista, namái aportaba l'obediente telón de fondu -imaxínense vustedes al difuntu Jesús Gil y Gil presidiendo España, pues eso-, pero faltaben dalgunes pieces. Les más afectaes, como Hamás y Netanyahu; o l'Irán qu'agora se llambia les feríes, pero que nun ta nidio que tenga dicho la cabera. Tampocu representación china; a Rusia, anguaño arrecendía, nun se la esperaba. Y tampocu s'oyíen los disparos de les execuciones sumaries llevaes a cabu en Gaza, al mesmu tiempu, polos terroristes de Hamas escontra les milicies nun obedientes. Ye lo qu'hai.
Que tornen los rehenes ye un ésitu mayor que nun puede negáse-y al señor Trump, pero, pal restu, pal futuru viniente, hai que ser mui prudentes. Meyor oportunidá pa la paz que la qu'Ariel Sharon-yos ofreciera cola retirada unilateral de Gaza nel 2005, Exércitu israelí y asentamientos, too, nun la hebo; y yá ven cómo foron les coses dempués. Güei la situación ye muncho peor.
Hamás ta demasiado infiltrada na xente gazatí, con neños educaos pal martiriu, y namái necesita armamentu llixeru pa siguir controlando les estremaes ciudaes de la Franxa. Bibi Netanyahu sabe qu'en cuantu que pierda'l poder, posiblemente nes eleiciones vinientes, va ser pastu de los tribunales israelíes. Donald, que yá triunfó en 2020 col so alcuerdu de Doha colos talibanes, y miren agora cómo ta Afganistán, yá tien cobrao'l so momentu de gloria en Gaza. A estes... ¿qué pintaba ellí'l de la FIFA?
Ye posible qu'agora llegue'l momentu d'Ucrania. Afítense los ucranianos, y nós tamién.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo