Tilly Norwood, la estrella ñueva
En Hollywood tán ablucaos. Aínda nun tien fecho dala película pero yá hai dellos productores que quieren contratala, y ye qu'hai que reconocer que ye mui prestosa y resulta familiar al primer güelpe de vista. Dalgo que ye lóxico si tenemos en cuenta qu'ella nun esiste, ye, simplemente, el resultáu d'un algoritmu y la intelixencia artificial, que metieron na so xenética los güeyos, la barbadiella, la ñariz, el pelu y la boca de personaxes yá coñocíos, familiares y guapos, esto ye, lo meyor de cada cara, pa llograr un rostru absolutamente encantador. Tilly Norwood.
Nos sindicatos estremaos del gremiu cinematográficu anden cola mosca tres la oreya, pues, anciosos ellos, incluyeran como prohibida esta posibilidá demientres la dura fuelga que caltuvieron nun va munchos años. Y ye qu'ellos sabíen de qué taben falando, pues yá Schwarzenegger, nuna peli del 87 dirixida por Paul Michael Glaser, de nome "El Fuxitivu", "The running man", y mui mala, yá que tal, permala, llevábemos a un 2017 qu'anguaño ye pasáu nel que, nun mundiu d'autoridá dictatorial, qué mieu, al protagonista, Arnold, sustituyíenlu nel programa televisivu de persecución a muerte y audiencia global por un sosias creáu por, nun recuerdo cómo lu nomaben entóncenes, intelixencia artificial. Ye lo qu'hai, vamos retrasaos con esta Tilly.
Con Arnold tamién de prota, vienme l'alcordanza daquella "Desafíu total", "Total Recall", de Paul Verhoeven, 1990, abondo meyor que la primer, y con una perguapa Sharon Stone faciendo de mala malísima, na que nun Marte de 2090 salía un taxi de conducción autónoma y, sobremanera, pal plasmu y descoyone nacional, un mutante de paecíu descacharrante con Jordi Pujol que salía de les costielles del mutante portador. Y que muerre metanes una engarradiella, por cierto.
Con "Terminator", de 1984, ambientada en 2029 y dirixida pol posteriormente oscarizáu James Cameron, entramos n'otru nivel, el del armamentu autómata o teledirixíu, nesti casu en forma de cíborg, dalgo que la guerra d'Ucrania col panel de drones perampliu de toa mena mos ta amosando yá como una realidá a la que-y falta mui poco p'aportar a esi terminator, como Francisco Rubio Damián mos cuenta na so "La guerra de los robots".
Hai munches más amueses de lo que Tilly Norwood mos promete, con "Blade Runner", y la so distopía de replicantes, basada nuna novela de 1968 ambientada nuna fantomática Los Ángeles de 2019, y dirixida por Ridley Scott en plenu esplendor creativu, o la, pa min, fabulosa "Gatacca", de 1997, que mos amuesa una sociedá, entóncenes futura pero que s'asemeya dramáticamente a l'actual, na qu'imperen la euxenesia y la seleición xenética pa la concepción de los neños.
Hola, Tilly.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo