Apoteosis interrupta
Fo una Selmana grande pa los anales, por duración ya eventos, dalgunos, como la Feria de Muestres, d'ésitu aseguráu; otros, como Fuegos o conciertos, más al azar del tiempu y los humores del públicu. Sicasí, nos díes previos, la Feria taurina, colos sos carteles y el puxu recobráu tres la clausura incamentable del gobiernu concexil anterior, paecía destinada a dar, otra vegada, la campanada.
Nella, la participación del profeta del toru, o mesíes pa dalgunos, esi Morante de la Puebla, qu'esti añu abasna multitúes tres de sí, como aquel galiléu, anque ensin facer milagros, si bien digan que'l so toréu tenga dalgo de místicu y relixosu, sumponía'l cuelmu d'un trabayu aballador de los xestores la plaza, yá que, al tirón induldable del sevillanu, xuntaben a un Roca Rey que fo l'acicate de la fiesta estos años caberos, y xunto a ellos, un Ortega que, a puntu de ser devoráu pol papel cuché tres la so escapada énte l'altar, que non énte'l toru, tien sabío hilvanar un par de temporaes que lu alluguen ente lo más granao del escalafón.
El tirón yera talu que la plaza vendióse práuticamente entera, y, tres el sofocón que supunxo la coyida de Morante, malapenes hebo devoluciones, algamándose los 9.000 espectadores. Esto ye, que, como diría aquel vieyu dúo cómicu, la plaza taba abarrotá, pa disgustu d'antitaurinos y animalistes, y tamién de dalgunos aficionaos, que se quedaben ensin esi duelu, pa min fantasía de cronistes interesaos, ente'l de La Puebla y el peruanu. Ye lo qu'hai.
El Bibio llucía rescamplante, y la puerta grande abrióse a la fin pa esi Ortega, a priori la cenicienta del cartel, ensin que Roca o'l sustitutu Fortes pudieran facer un res p'averase al triunfu del primer. El frontal de la nuesa coqueta plaza resplandía coles tres banderes baxo un cielu arroxáu poles quemes, eses que tantu-y cuesta a la señora alcaldesa llantar nel nuesu balcón braniegu, la Escalerona. Y dientro, nel bullir del públicu notábase la presencia de munchu arribista d'última hora, pues los gritos estentóreos, a destiempu y repetíos nun son más qu'una amuesa d'incivismu dende l'anonimatu del tendíu; especialmente cuando se referencien na fruta y el presidente del Gobiernu.
A min, qu'esti añu nun llevé habanu por prudencia, chocóme'l comentariu d'un fumador a mio costáu qu'ente gin-tónic y puru mascullaba dalgo asina como "cuanta verdá tien", refiriéndose a Ortega, y a min, nun siendo espertu nesas fondures, sonóme a como cuando te dicen que la sidra nun espalma bien... ¿y qué? Pues eso.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo