Funeral de Mazón, mitin de Sánchez
Yera inevitable ayeri nun prestar atención al actu que tenía llugar en Valencia. Nun marcu incomparable como ye la Ciudá de les Artes, y un añu xustu dempués de la dana tráxica que se llevó la vida de 237 persones. Cómo nun tar atentu.
El casu ye que, con un pocu d'imaxinación -nun facía falta muncha-, ún podía prever lo qu'ayeri asocedió con abondo esactitú, especialmente tocantes al reptante presidente de la Xeneralidá valenciana, quien nos meses caberos más qu'avanzar o caminar paeciera que s'arrastra pel camín de la so esgotada carriera política. Víctima ayeri, ente les families de los muertos, de calter políticu y casi ofrenda que'l presidente Sánchez amosaba al mundiu gracies a la televisión.
Lo d'ayeri, en cuantu a Mazón, foi un esquite orquestráu al milímetru pol gabinete de Moncloa, que nun sé cuántos réditos llegará a da-y, pues en pocu tiempu les imaxes van quedar pa ilustrar los aniversarios caún de los años vinientes. Nun dan más de so, pero, sicasí, alcuentro una carga de más algame nes pallabres del Rei cuando apeló a estudiar lo asocedío y sacar les conclusiones necesaries pa enzancar que'l desastre vuelva a producise.
Quiciabes la Casa del Rei yá nun tenga'l nivel de los tiempos de don Sabino Fernández Campo porque eses pallabres paecen dar a entender que SM nun ta al tantu del trabayu del xeneral Gan, con dos documentos, ún que da cuenta de los daños causaos y el procesu y cuantificación de la so recuperación, y un segundu nel que propón midíes pa torgar que torne a asoceder, o alo menos desanciar les sos consecuencies.
Al xeneral Gan quiciabes-y asoceda como al xeneral Cassola, nomáu'l reformador, que la so propuesta de modernización del Exércitu fo refugada en Cortes pero que, dempués, foi recuperada puntu per puntu por gobiernos posteriores, y ello siempres va ser meyor que lo asocedío al xeneral Picasso, que'l so informe foi "secuestráu" por Primo de Rivera y nun llegó a ver el llume. El del xeneral Gan ehí ta, pa usu, si ellos quieren, de los valencianos.
La rabia d'ayeri de dalgunos familiares escontra Mazón, nun sé hasta qué puntu azuzada pola redolada de Compromís que controla'l mundiu asociativu de la zona, tapó, en ciertu mou, la solemnidá del actu, que se dedicaba a les víctimes, en definitiva, d'un actu provocáu pola ñaturaleza, y a mín, que yá tengo dellos años, veníame l'alcordanza d'aquelles víctimes d'ETA, protagonistes silenciosos munches vegaes de funerales semiclandestinos y qu'aínda güei, munchos d'ellos, tan esperando xusticia. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo