Pepín el buenu
Na mío xeneración la historia patria tratábase abondo y una de les figures que mos resaltaben yera la de Guzmán el Buenu, por aquello de sacrificar al so fíu enantes qu'entregar la plaza de Tarifa a los nemigos del so rei. Anque paeza mentira, la del coronel Moscardó, defensor del alcázar de Toledo demientres la Guerra incivil, y col so fíu fusiláu polos asediadores, nun yera tan aireada nel currículu escolar del denostáu franquismu. Ye lo qu'hai.
El casu ye que Guzmán el Buenu representaba especialmente los valires de llealtá, honor, valentía y sacrificiu, toos ellos d'importancia especial pa los rectores d'España naquella dómina, y nun incluyo'l patriotismu, sí nel casu de Moscardó, por aquello de que'l de Tarifa yera al rei a quien xuraba llealtá y non a la Patria.
Nel mío pequeñu mundiu infantil xixonés nun se diba tan lloñe no de los valires, pero sí los había, y, especialmente pa mío madre; teníase que curialos dende l'entamu, poro a ella preocupába-y que yo me descarriara y me convirtiera nun pequeñu atorrante, vistes les amistaes coetáneas de les que me facía acompañar; pa nada del so gustu. Ella quería otra cosa pa min, y l'espeyu nel que debía güeyame yera Pepín el buenu. Un neñu tan buenu que nun rompía un platu nin queriendo. Pero yo, nada, aportunaba na sienda caleyera pa disgustu y preocupación materna.
Na vida suel asoceder asina, nun sabemos o nun acertamos a la hora d'escoyer les nueses compañíes, y, cuando se trata de persones normales, la cuestión nun tien trescendencia más alló de la redolada del individuu. Non asina cuando en llugar de persones falamos de personaxes, como ye'l casu d'un presidente de gobiernu, como ye'l nuesu casu.
El doctor Sánchez acaba de tornar d'una cume d'Europa cola Comunidá d'Estaos Latinoamericanos y Caribeños, un tinglao montáu pol difuntu Chávez, na dómina del maná petrolíferu venezuelanu, pa dexar fuera a los Estaos Xuníos y Canadá. Una cume au, xunto a él, los dignatarios más importantes yeren Lula y Petro, dos líderes significaos de la esquierda bolivariana, abondo lloñe dambos de les corrientes que fluyen anguaño n'Europa y al norte del ríu Grande. Amistaes peligroses, en ciertu mou y nel momentu actual. Quiciabes meyor fuera tener quedao en casa.
Mientes, el Rei, siguiendo les instrucciones del gobiernu, como ye la so obligación, viaxa a China, notra amuesa innecesaria del fecho diferencial español nesti momentu de tensiones globales, escaeciendo que siempres ye bono tener un Pepín el buenu como referente.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo