Mensaxe navidiegu
Nun sé per ónde entamar. ¿Quiciabes peles puertes de los mios vecinos que faen paecer esnuda y escarnada la de mio casa? Unu tien llantaes unes tires descomanaes con llazu que la faen semeyar como un paquete de regalu enorme, como anunciando una especie de centru comercial tres d'ella mesma, o dalgo asina. Los otros dos cuelguen adornos d'árbol navidiegu, con pinta de tener aportao a preciu amenorgao dende la China aballadora de Xi Jinping, cola salvedá de que proponen una mui yanqui Merry Christmas. Casi que me quedo cola mio puerta afarada, la mesma que nun s'abre cuando los pocos y azogosos neños de la comunidá vienen a pidir caramelos con ocasión d'esa fiesta importada del Halloween. Nun me presten les importaciones culturales populares, y menos les yanquis. Ye lo qu'hai.
A min prestábame la Navidá de la mio infancia. Que nun yera probe de solemnidá pero sí espurecha en bienes y regalos. Trayía, en cambiu, a lo menos nel mio barriu popular de La Calzada xixonesa, un montón de vivencies, muncho más arriquecedores que los caramelos arribaos de los USA; como aquelles castañueles feches con dos listoncillos de madera, colos que dalgunos algamaben percusiones dignes d'un conservatoriu. Yo non, yo diba abondo xustu nel asuntu. Pero con elles axuntábemos el grupín de guah.es y díbemos a cantar villancicos a les puertes del vecindariu, con un repertorio del que'l tiempu namái me dexó l'alcordanza d'aquel: "Nel picu d'aquel monte hai un perru cagando, pa los dueños d'esta casa que nun mos dan aguinaldo". Pieza que supongo nun cuntaba con más estrofes, pues siempre salíemos d'estampida tres la primer. Ye lo qu'había.
En Cimavilla, el mio barriu segundu, alcuérdome de l'ansiedá de la Nochebona, yá mozucu, pues tres la Misa de Gallu, lo de so yera recorrer en cuadrilla les cases de les moces coetánees, au yéremos gasayaos por unos pais que, supongo, consideraben más prudente y seguru caltenemos al algame del güeyu que nun vagando peles cais d'entóncenes. Un vezu que duldo que'l tiempu tenga caltenío.
Na decoración urbana tampocu m'emociona no que reparo. Una abondanza de lluces y colores de toa mena na que l'ausencia de motivos tocantes la Navidá-Natividá del Señor ye'l llugar común na mayoría de ciudaes d'España, cola esceición, en Xixón, de la Estrellona y el Pesebre lluminosu de San Pedro. Poro en casa esforciámonos en caltener el belenín, col amestao de los dos guardiaciviles dándo-y seguridá al Neñu, un pocu como la UCO fae con toos nós.
Feliz Navidá.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo