El maestru armeru
Cuando s'estendió l'usu de les armes de fueu nos exércitos, les averíes frecuentes y problemes estremaos qu'éstes producíen dieron llugar, por necesidá, a l'apaición d'un tipu d'especialista dedicáu esclusivamente al cuidáu de talos artefactos; yera'l maestru armeru, que tien llegao hasta los nuesos díes, anque yá nun se lu denoma d'esta mena.
Como quier que les armes daben abondo de problemes, yera dalgo mui frecuente unviar, al que sofría'l la situación, a ver al maestru armeru, con tanta frecuencia qu'acabo por ser una espresión corriente que, hasta anguaño, s'utiliza pa torgar una respuesta por inconveniente, o simplemente porque nun se tien. Vete a ver al maestru armeru.
Va dellos años atopávame al mandu del Batallón multinacional del Cuartel Xeneral del Eurocuerpu. Demientres unes maniobres d'especial importancia poles implicaciones de puesta a puntu les tresmisiones, fondamentales cuando se trata de dirixir un Cuerpu d'Exércitu, cumplíanos la responsabilidá de poner en marcha'l Cuartel Xeneral, pa lo que contábemos, ente otros preseos, con un grupu de xeneradores que, teóricamente, podía suministrar enerxía a una ciudá de 45 mil vecinos. Pero'l llovíu vieno a complicar la historia.
Aquello nun tiraba. Les caxes interfaz descomanaes, como caxes de sidra y teóricamente estanques, en realidá nun lo yeren. Los xeneradores saltaben y aquella maquinaria de combate grandiosa, ensin enerxía, nun yera a ponese en marcha. Hasta qu'un cabu alemán, Schmitz, responsable d'aquellos elementos, tevo la idea d'abrigar les caxes con bolses de basura. Y voilà, solucionao.
El retrasu fue d'hores, pero un día dempués l'exerciciu siguía ensin rincar, polo que se convocó un aconceyamientu con implicaos y responsables d'árees, a la qu'allegué con ánimu de condergáu. Ellí di cuenta del problema inicial y la so solución, y, cuando paecía que diba ser sometíu al escarniu públicu, el mío superior na estructura, con más información que yo, esplicó que'l retrasu, de más d'un día, debíase a la sofisticada y casi imposible maniobra electrónica y dixital que los responsables d'esa área diseñaran, y que trataben de caltener, hasta entoncenes, fuera del conocimientu xeneral.
Yera un casu pa reclamar al maestru armeru, o nesti casu al cabu Schmitz. Los responsables verdaderos callaben, esperando que la nube pasara y fueran otros, nesti casu yo, los que corrieran col gastu de la responsabilidá. Un pocu como'l nuesu gobiernu, que nin na Dana tevo a bien moyase, nin nel apagón tien recibío un chispazu, y agora, col desastre sangrientu d'Adamuz, ta a la gueta d'un maestru armeru que-y resuelva'l problema, o meyor aínda, que cargue cola responsabilidá. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo