L'escarrilamientu de la marca España
Lo de la Marca España foi un inventu de Carlos Espinosa de los Monteros, un empresariu y aristócrata qu'echó'l restu al frente institucional del asuntu ensin llevase un euro -nun-y facía falta- al bolsu. Dempués, col aportar d'un gobiernu regresista al frente los designios de la nación, el negogiu pasó a ser una secretaría d'estáu, con tantu de pecuniu pal so dirixente, qu'a la so tiesta creyo recordar que tevo la biógrafa del nuesu inabordable presidente de Gobiernu.
El conceutu nel mundu empresarial, d'u provenía Espinosa, asemeyase a la Imaxe y reputación corporativa, dalgo que tien implicaciones descomanaes nos resultaos de la empresa de que se trate, y que puede llevar a cataclismos internos auténticos en función de les repercusiones, especialmente les negatives, que dalgunos asocedíos puedan tener pa la imaxe de la marca. Ye lo qu'hai.
Escribo esto dempués de güeyar la inauguración de la Olimpiada d'hibiernu en Milán, tamién, al mesmu tiempu, en Cortina d'Ampezzo. Tou un españíu de marca Italia, un paroxismu d'exaltación de lo italiano metanes un eventu d'algame global, como son les Olimpiaes, y ello magar l'hieratismu marmóreu de Mariah Carey na so curtia intervención y cantata, n'italianu, por cierto. Y ye que los italianos saben lo qu'importa la imaxe institucional.
Nós díbamos embalaos nos nuesos trenes d'alta velocidá, a puntu d'algamar los 350 km/hora, según anunciaba'l nuesu ministru del ramu. Y anublaos quiciabes nesa velocidá tremenda, y nes cifres enormes que los voceros gubernamentales mos repetíen, como'l PIB o los millones de turistes, llegamos a pensar que yéremos la punta de llanza d'Europa, inclusive d'Occidente. Hasta que, pela cola, el tren entamó a escarrilar. Y ehí too foi un Ay.
Ayeri güeyaba les imáxes, con esa Meloni, despreciada por casi toos cuando aportó al Gobiernu, y agora envidiada polos gobernantes europeos pol so desenvolvese nel campu internacional, nel palcu de San Siro, y nun podía menos que pensar en cómo'l nuesu presidente tien que recurrir a foros tercermundistes y proclames populistes -compraes por tol mundu y ensin que naide sepa como llevales a cabu- que-y den un percorríu temporal nes páxines de los medios de comunicación.
Detrás del escaparate nacional, puestu n'evidencia pol desastre d'Adamuz, enantes pola debacle de la dana, van apaeciendo les grietes que la falta de caltenimientu en tou tipu d'infraestructures dexa al descubiertu, tantu neses víes, responsables primeres del accidente, como en carreteres, como en preses y pantanos, como en puertos y aeropuertos. Too se cae, too ye un escarrilar, y de la marca España, pel momentu, meyor nun falar.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo