La música de ca dómina
A la fin del 2012 vivía en L'Habana, y tuviera oportunidá de reviciar en direuto d'Eliades Ochoa, anqu'aporté tarde pa Compay Segundo; dambos referentes del Son Cubano, al que, ente otros, el Buenavista Social Club pusiera de moda en tol mundu. Pa entóncenes, yá morriera la gran Celia Cruz, y Bebo Valdés diríase un añu dempués, dambos ensin poder tornar a pisar la so tierra cubana por decisión de Raúl Castro. Los sos cadabres aínda esperen regresar dalgún día.
Lo cierto ye que la música de la redolada caribeña siempres me tien prestao, entamando pola cumbia, siguiendo pol merengue, y llegando inclusive hasta la bachata, pero entendiendo que toos esos sones y tendencies viaxen a caballo de los tiempos, y éstos acomodaos a les variaciones de la cultura; enantes con calter nacional, o rexonal, y agora con algames globales. Ye lo qu'hai.
Nesa fin de 2012 yá'l reggaetón aniciaba a pegar fuerte, y nun me convencía, tampocu'l famosu perréu, anque véxome obligáu a duldar de min mesmu teniendo en cuenta la edá cola que m'algamó. Pero, pa la mío sorpresa, el propiu Raúl Castro, yá entós monarca absolutista y absolutu de los destinos cubanos, entró nel asunto pente medies un decretu cargáu de prohibiciones tocantes esta corriente musical, a la que tachaba de chabacana, vulgar, sexista y contraria a la cultura nacional de Cuba, cualquier qu'ésta seya.
Nun ye necesario esplicar qu'esta vegada Raúl Castro, inspirador de los fusilamientos propios na Sierra Madre, dempués, de les depuraciones sangrines tres la cayída de Batista, y tamién de los fusilamientos caberos del xeneral Ochoa y los sos subordinados, nun tevo dalu ésitu na so campaña, y anguaño'l reggaetón ye un fenómenu mundial.
A Bad Bunny, coneyín malu, nun lu sigo; de fechu, sigue ensin prestame'l xéneru. Tampocu'l fútbol yanqui, nin el béisbol, pero l'otru día, en diferío, y énte l'aruelu desatáu tres la Superbowl, decidíme a investigar l'asuntu... y aínda toi impactáu. Y ye que, anque cueste entender les lletres, pola vocalización precaria -Trump tampoco lu entendía-, anque too paeza una gran balasma, anque a ratos nun sepas a qué atender, el resultáu ye grandiosu. Un espectáculu total, condensáu en doce minutos, con una cascada de mensaxes, más alló de la coreografía impactante, o l'aición del protagonista, o los sos invitaos.
Los analistes políticos, los musicales y los deportivos quedaron en segundu planu, ven l'eventu como un'aición d'impautu rendideru, muncho más alló de lo que puede facer un conciertu de dos hores. Y puede que tean no cierto. A lo menos munchos nos EE XX tendránse enterao de qu'hai una América más alló y dientro les sos fronteres, y del ICE.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo