Rufián, el Pihoaparte de la Carrera de San Xerónimu
Oyía va delles nueches comentar a un tertulianu que-y facía gracia Rufián poles salíes de tonu que suel tener nel Congresu, ca vegada menos estrambótiques y güérfanes de parafernalia accesoria. Anque, de xemes en cuando... A mín, más que gracia, provócame tenreza, en cuantu que, casi dende la so apaición na política española, imaxiné'l so bregar dende los instantes primeros de la so vida "profesional", tratando de sacar la tiesta penriba les augues aturbolinaes de la política nacionalista catalana, p'alendar a bocanaes ente les aguadilles de los sos collacios con pedigrí; más, muncho más, catalanes qu'él, un probín charnegu que, como aquel Pihoaparte, busca medrar nuna non declarada llucha de clases, qu'aínda se perpetúa na so Cataluña del alma.
Manolo Reyes nun tornó a la so Murcia orixinaria, tampocu lo va facer Rufián al Xaén de los sos güelos. Nun se trata d'eso pa él, y la so Teresa, el trampolín pa espolletar, llámase Ezquerra Republicana. Pero ellí, ente los sos supuestos correlixonarios, yá-y tomaron la midida. Tomáron-yla dende l'entamu, cuando vieron nél un aporte posible de votos dende'l cinturón socialista de Barcelona. Pero nada más. Güei la pela, los votos, xuéguense estremao.
Rufián, como Reyes, faltosu nun ye, y poro anda estos díes buscándose la vida na capital, anque non yá como voceru del so partíu, au nunca fo queríu pero sí necesariu, y agora, con un Junqueras casi tan a la defensiva como él mesmu, danlu por amortizáu. Asina que toca abrir otres opciones pa siguir nos barrios altos de Barcelona, na Carrera de San Xerónimu, na capital.
La Teresa de Rufián ye la política nacional, onde paez que los sos patrones yá namái lu güeyen como un charnegu con pretensiones, como Reyes, y el nuesu bufón cortesanu anda llocu tratando de vendese como solución pa esa esquierda regresista, siempres a la gueta d'un sillón mientes canta a los crédulos la so vocación de serviciu a los probes, a los escaecíos, a los indignaos, a los que nun se percaten de cuáles son les sos intenciones verdaderes, l'Alministración, dende un bon despachu, de les ilusiones vanes de los demás.
El Pihoaparte acabó na cárcel, y nun creo qu'esi vaya a ser el destín de Rufián; de fechu, colos años que lleva de diputáu va tener drechu a una bona indemnización, pero él sabe que, más alló de la política, nun tien futuru, pues ye lo único que sabe facer, y poro, hasta'l momentu caberu, vamos velu braciar pa nun s'afondar nes augues aturbolinaes de la política catalana. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo