Maxestá, tráyamos de vuelta al Rey
Estos díes caberos malapenes se fala de Begoña, non; nin del so cuñáu, el xermanísimu; y nun se produz esta ausencia de noticies porque l'iter xudicial se tenga detenío, que non; nun se fala d'ellos porque hai asuntos más importantes que tratar, y que lleven la nuesa atención haza otros ángulos o requexos del día a día que torguen que mos acordemos de la familia de Pedro Sánchez.
La sacada cabera de la chistera del nuesu presidente de Gobiernu fo la desclasificación parcial de los archivos del 23F, esto ye, de l'asonada o intentu de güelpe d'estáu de 1981. Un eventu que, si estudiamos lo que mos cuenta Curzio Malaparte na so "Tecnica del colpo di stato", tevo muncho d'alambicáu y, al tiempu, d'astracanada, pero que, sicasí, pudo acabar unviando a la papelera histórica'l nuesu incipiente Estáu democráticu y representativu.
La idea, a lo que paez, pal del "Manual de resistencia", consistía en distrayer l'atención del personal, demasiao interesao nes cuites familiares y otres del inquilín de la Moncloa, y llevalu a otros requexos más, aparentemente, apetecibles pal mercadéu de cuentos, cuentetes ya historietes; dalgo que, si amás pudiera implicar a la Corona, resultaba doblemente interesante.
El rei Xuan Carlos ye, actualmente, un blancu fácil. La so floxera n'asuntu de baxos ye proverbial, como la historia diz qu'asocede colos borbones, y cuesta poco condergalu poles sos debilidaes amatories, escaeciendo que nel so tiempu una de les figures mayores del gobiernu caltenía doble familia, y dalguno aplaudía la so hombría. Ye lo qu'hai.
En temas económicos tenemoslu denostao por cobrar comisiones por xestiones que traxeron bayura y puestos de trabayu pa la nuesa nación, escaeciendo que la nuesa monarquía, a diferencia del restu d'Europa, fo desaposiada de les sos propiedaes a lo llargo del sieglu XIX y XX. Ehí tán el Prado y les coleiciones reales pa recordámoslo.
La realidá ye que'l rei Xuan Carlos heredó una monarquía absoluta qu'él, discrecionalmente, decidió camudar nun sistema democráticu de calter representativu; el qu'anguaño reviciamos, o sufrimos, según se mire. En tou casu, el 23F supuso un finxu históricu que, por motivos estremaos, aínda sigue dando que falar, y que, cola desclasificación d'ayeri, realza un puntu más, la yá fondamental figura del Rei.
Güei n'España yá nun queden ideoloxíes, namái intereses. Los partíos más antiguos del escalafón son irreconocibles, y son los tuit y españíos del día los que marquen l'axenda política, pero una nación con una historia como la nuesa nun puede permitise que daquién como'l Rei se muera lloñe d'España. Y el so fíu tampocu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo