Si vis pacem...
Na Academia Xeneral Militar de Zaragoza, el centru d'enseñamientu au se formen los oficiales del Exércitu Español dende 1927, esiste un llugar emblemáticu, la Escalera del cañón, estructura central que vertebra'l cuerpo central y les ales del güei aneyu edificiu, y sobro la so entrada, en lletres de molde de color colloráu sangrín, la lleenda "Si vis pacem, para bellum", si quies la paz prepara la guerra. Una máxima que, dicen, pertenez al autor romanu Vegecio, quién alló pel sieglu IV yá diba abondo preocupáu pola forma cómo l'Imperiu s'adaptaba a la problemática que-y venía enriba.
A mín estos pensamientos provocómelos la nuesa ministra de Defensa, que tevo a bien visitar el nuesu Reximientu "Príncipe", número 3 de los qu'anguaño caltien la nuesa Infantería y que, según ella, ye pioneru na téunica de combate ñueva que suponen los drones, nesti casu los aéreos, anque como muncha xente conoz, gracies a los ucranianos, habelos, de toa mena, hai-los, esto ye, terrestres, navales y tamién somarinos. Tou un universu'l de los drones, y tou un ñuevu y tarrecible campu de batalla nel que se mueve la infantería en xeneral, y tamién la de nueso.
El "Príncipe", al paecer, cuenta con un pelotón dedicáu a esti menester, anque comparte plantilla con un equipu de francotiradores, lo que mos da unes cuentes bien arrezquilaes pal asuntu de los drones, pero en fin, per dalgún sitiu hai qu'entamar; y ye que, del optimismu de la Ministra cabe deducir que nadie-y tien esplicao que nun va muncho, selmanes, nun exerciciu de la OTAN, na zona del Bálticu, decidieron usar como nemigu una unidá de drones aportada por Ucrania, col resultáu del aniquilamientu de los batallones de vanguardia en menos de tres hores. Ye lo qu'hai.
Les imaxes de Pruvia producen congoxa si se tien en cuenta qu'Ucrania produxo 4 millones de drones l'añu pasáu, 2.4 l'anterior, y espera llegar a 7 nesti que tamos. Falamos d'un campu de batalla nuevu, qu'evoluciona a mayor velocidá de la qu'un Patriot emplega pa baltar un drone iraní, con un coste cien vegaes superior al del oxetivu.
La señora ministra amosóse mui enfáticu, como n'ocasiones y llugares anteriores, señalando que "invertir en defensa ye invertir en paz", sorayando la xeneración de puestos de trabayu que supón esa inversión como un valir casi más importante que la propia defensa, dalgo mui destacable pal réditu políticu pero que, vistos los tiempos del Dragón, ye posible que seya una inversión manía si realmente nun ye la fayadiza pa los tiempos que cuerren.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo