Los bañistes de la Escalerona
Taba espléndidu'l Muru esta mañana sabatina. Enllenu de xente, vecinos y foriatos que reviciaben del sol como si trataren d'apurar lo que los presaxos meteorolóxicos anunciaben pela tarde; tambascaes a tou trapu, pa placer y allegría de chigres y sidreríes, supongo.
La playa, la sablera, en baxamar, rescamplaba colos primeros paseyantes a la vera la mar, dellos bañistes de fin de selmana, pocos, y, sobremanera, l'ausencia del usuariu canín y acompañantes de los periodos serondiegos ya invernizos. Al auga namái s'averaben dalgunos neños y los sos pais sacrificaos. Na Escalerona, como casi tolos díes del añu, unos pocos bañistes/nadadores, ellos y elles, procedíen a secase y recuperar el so aspeutu ciudadán. Y sobro ellos la bandeira amariella que daba cuenta que yá tenemos serviciu de salvamentu, con un cuartetu de paxellu colaráu confirmando la observación vexilóxica.
A min, la postal, recordábame la imaxe de va dellos díes, con ún d'estos bañistes, esos que namái'l temporal consigue amedranar, y que casi tolos díes, a media mañana, podemos atopar nesi nuesu monumentu urbanísticu art decó -con elles, de cutíu, emplegando un vestuariu portátil de cartón que dexa en mui mal llugar a la ciudá y los so rexidores- acubixándose del llovíu baxo l'alar, que non antoxana, de la oficina d'información qu'hai nos xardines del Náuticu. ¿Nun se merecen dalgo más?
Que digo yo qu'hai espaciu ellí pa instalar unos vestuarios nuna instalación semeyante a esa oficina, puestu qu'aquellos de la Pescadería municipal son yá historia, y estos usuarios, por usu y tradición, son, lo que ye güei, los que más drechu pueden presumir pa que se-yos atienda con unos servicios en consonancia cola ciudá que pretendemos ser.
Nel mío paséu y d'observador atentu, o lo qu'enantes llamaben mirón curiosu, pude dame cuenta que dalgunos d'esos visitantes foriatos paseyaben armaos de café y brioche portátil, lo que me lleva a pensar que pertenecíen al nutríu grupu de los turistes axustaos, esos que salen de casa, más por poder contalo posteriormente que per otra cosa, y, güeyando la ocupación modesta de les terraces de la plaza'l Marqués y el Muelle, creyo que ye un pensamientu adaptáu a la realidá.
Supongo que too suma, y pa una ciudá, como la de nueso, necesitada d'un arremangu renovador, too ye positivu, cruceristes, turistes de fin de selmana, congresistes, lo que ye güei inesistentes, y cualquier cosa, quitando les despidíes de solteru, que pueda aportar dalgo a la recaudación llocal. Ye lo qu'hai.
Yá que tal, quiciabes tien llegao yá'l tiempu de pensar n'allugar una bandiera nacional en dalguna parte del Muru. Pa que se sepa ónde tamos.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo