Tiempu de tentase la ropa
Cola edá unu entama a pensar que ta más preparáu que la mayoría de les persones pa entender la realidá que se presenta, o s'escuende, énte nós; y lo cierto ye que tamos abondo enquivocaos. La realidá en realidá nun esiste, namái esiste lo atalantao, y esto ye dalgo sobro lo que munchos filósofos lleven dando vueltes dende va munchos años, sieglos inclusive. Y nel algame curtiu, que ye nel que vivimos y mos desendolcamos, l'enclín ye a usar los dichos, conseyos y refranes que veníemos oyendo y asumiendo dende que yéremos guah.es, pa describir esa realidá que, mui de cutiu, nun algamamos a entender en tola so dimensión.
Yo, esta mañana, sobrosaltéme, anque quiciabes nun debiera, coles informaciones tocantes les eleiciones rexonales nel Reinu Xuníu. Un cataclismu, dicen, especialmente pa los laboristes, lléase socialistes, que gobiernen ellí nesti momentu. Y ye que, nel casu de Gales, nin siquier la presidente del Gobiernu rexonal tien calteníu'l so escañu. Primer vegada en cien años. Tarrecible.
Ellí, Gales, y n'Escocia, la del whisky, afararon los partíos nacionalistes, siguíos de los populistes de dreches del señor Farage, l'apóstol del Brexit, colos tories, los conservadores, casi desapaecíos, consecuencia quiciabes de la etapa Boris Johnson; colos ecopopulistes tamién sacando pechu, y los laboristes en dambes rexones con un piñazu épicu. Terremotu sociolóxicu.
Agora miren vustedes a Hungría, con victoria histórica del señor Magiar, que ye igual d'ultranacionalista y conservador qu'Orban, col matiz de que nun ye prorrusu y sí proeuropéu, anque equí la llectura mediática pasara volando sobro'l fechu de que la esquierda nun sacó nin un solu escañu; nin unu. Pa facéselo mirar.
En toa Europa'l paisaxe ye semeyante. Los partíos clásicos, d'esquierda y drecha, nun consiguen dar cola tecla que los ponga en sintonía colos qu'enantes yeren los sos votantes, y ello magar qu'estos, los votantes, intenten decí-y-lo en cada votación. ¿O ye que nun quieren enterase... los partíos? Chungu asuntu, como pa entamar a tentase la ropa.
Equí, n'España, los tiempos estréchense, tamién nos EE XX, onde'l campeón mundial del populismu ve cómo'l verdugu electoral anunciáu pal payares viniente s'avera inesorablemente, magar los trapicheos colos distritos eleutorales; y la so más que posible derrota pue llevar a pensar a dalgunos que too torna al so calce; pero non, los sos tiempos, los de los yanquis, nun son los de nueso, y equí, n'Europa, y n'España, una eleición tres otra mos amuesa que'l desasosiegu de los votantes crez ca vegada más y preocupantemente.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo