El caberu merenderu urbanu
L'otru xueves fo'l primer día de calor braniegu en Xixón. Güei tien fecho muncho más calorón, dambos díes, sicasí, yeren esperaos, y tres tanta augua cabría añedir que deseyaos. Y a min, ayeri, como notres ocasiones del tiempu estivu, tornando a xintar a casa y garrándome de camín, vienome l'antoxu de tomar una sidra nel merenderu de Casa Arturo. Pero yá nun esistía la posibilidá.
Enantes de xirar pa guetar l'aparcamientu viénome l'alcordanza qu'esi maraviosu restaurante, sidrería, chigre y merenderu, pieslló les sos puertes el mes pasáu y, poro, quedámonos güérfanos del caberu merenderu urbanu que tenía la ciudá. Yá perdimos va dellos años el del Puentín, ellí mesmu, a namái unos pasos y asomándose al ríu Piles, pero lo de Casa Arturo ye, quiciabes, más doliosu, pues significa dicir adiós a un Xixón que s'esmorez y que yá nun va tornar. Ye imposible.
Agora lo de la nuesa ciudá son los fast-food, y escribolo asina, n'inglés, tratando de sorayar la repercusión cultural que supón esi esporpolle esponencial d'esa mena d'establecimientos nela contorna del centru-muelle del nuesu Xixón del alma. Ye lo qu'hai. Esto ye, el cambéu, nidiu y ensin posa, del dominiu cognitivu nel que se desendolquen les xeneraciones ñueves; que, tocantes les tradiciones, como la tan trayida y cacarexada cultura de la sidra, yá malapenes tiran del escanciáu y decantense poles formules del tapón escanciador. Que nun ye lo mesmo.
En casa Arturo tampocu se podía cantar. Eso yá lo prohibieron va tiempu, por inconveniente dicíen, y con ello desapaecieron los cancios de chigre. Pero nel so merenderu aínda podíes sentate a reviciar d'unos momentos, solu o acompañáu, y echar tú mesmu unos culetes, mientes pensabes nes musarañes, no guapa que ye la nuesa tierra, nos coñazos del trabayu, o, simplemente. echar una parolada colos tos collacios.
Amás d'eso, si queríes quedar bien con familia o amigos, podíes dir ellí a esfrutar del so calderete, o, para los de picu finu, el so repollu amariscáu, inclusive los sos estraordinarios chipirones; pero yo, nel branu, guardaba siempres una ocasión pa encarga-y la so ventresca de bonitu al fornu que, me temo, va desapaecer agora del cartel gastronómicu de la ciudá. Una pena.
Lo de Arturo nun foi una traición. Llevaba tiempu, la edá nun perdona, queriendo trespasar el negociu, según el mesmu mos treslladó, pero nun atopaba naide con capital y ganes pa facese cargu del desafíu, y a la fin va ser una operación inmobiliaria la que tome'l rellevu d'una Casa que demientres más de sesenta años sirvió a los xixoneses.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo