Estáu d'ignominia
L'Estáu, simplificando'l conceutu al máximo, ye la forma como s'organicen les sociedaes modernes sobro un territoriu determináu. Nel casu de nueso, España, la nuesa Constitución diz que somos un "Estáu social y democráticu de drechu"; definición na qu'atopamos tres aspeutos a cuálu más importante, anque nin ye'l sitiu nin l'oxetu d'esta tribuna afondar nesa definición. Ehí lo dexo.
Más alló, nel artículu 116, nel nuesu textu constitucional alcontramos les situaciones nes que se puede atopar l'Estáu, que sedríen: l'estáu d'alarma, el de esceición y el de sitiu. El primer d'ellos previstu, fondamentalmente, pa situaciones de catástrofe ñatural; el segundu alteraciones graves del orden públicu, con posibilidá d'acutar dalgunos drechos; y el tercer, l'estáu de sitiu, "güeyu al datu", pa insurrecciones, actos de fuercia escontra la soberanía, la integridá territorial o'l ordenamientu constitucional; tamién con sospensión de drechos y, amás, dalgunes garantíes xurídiques. Siendo esti tercer estáu del que más se tien falao estos díes con ocasión del asaltu lleváu a cabu na ciudá de Ceuta.
Tou esti llargu entamu vien a cuentu de proponer una cuarta situación, l'estáu de ignominia, conceuto esti, el de la ignominia, equivalente a l"afrenta pública", dalgo que, según la propia academia, equival o conlleva'l deshonor, l'oprobiu o'l descréditu. Y agora, párense vustedes, ensin siquier ponese nel llugar de los ceutíes, que son quienes direutamente lo sofren, y analicen el mes llargu d'asaltu y dempués ocupación d'esa ciudá española. Una ignominia.
Y como quier que la sucesión de situaciones estraordinaries d'estos años caberos, dende'l volcán de La Palma, pasando pela dana, les quemes, la emigración escontrolada, Adamuz, l'apagón, etc., nos que l'Estáu -los sos dirixentes- tienen amosao una incapacidá notoria pa trepar cola resolución del problema, en cuantu a los efeutos inmediatos, y dempués en rellación coles midíes que puedan torgar o enzancar la so repetición, acabo por concluyir qu'esi estaú d'ignominia, nel que na mío opinión, y con toa clarencia, anguaño mos topamos, tiene razones abundoses nes flaqueces y furacos negros del nuesu maraviosu y rimbombante "Estáu social y democrático de drechu" como pa que pensemos que, nel futuru, vamos a alcontramos en situaciones semeyantes.
Anueche, nel programa más vistu de la televisión española, amosábenmos un pelotón de robots humanoides moviéndose pel set y dempués baillando con un cuerpu de danzantes humanos, y el presentador sollertábamos sobro esi futuru qu'avanza a velocidá d'IA y matemática cuántica. Y nós, como nel 98, el del sieglu XIX, tamos impreparaos pa lo que vien. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo