La xestión del desengañu
Güei tráyemos la prensa la noticia de que, una vegada más, l'enllaz Lloreda-Veriña, que debiera alliviar el tráficu de camiones per La Calzada, torna a la llínea de salida. Esta ocasión, paez ser, un informe d'impactu ambiental ye'l responsable, pero, como siempres, los paganos son los vecinos d'esi barriu, nel que pasé unos cuantos años de la mio infancia, que na mio opinión merecen un premiu "Princesa d'Asturies" pol exemplu de civismu, y xestión de la frustración, que lleven dando demientres tantos años.
Ye de suponer que la nuesa alcaldesa, con tol drechu, fará usu d'esta enésima tomadura de pelu a la ciudá, que se xune a les del metrotrén, la intermodal, Cabueñes, etc., pa cuando llegue la campaña eleutoral del añu viniente. Y tampocu me diba sosprender si, como vien asocediendo dende que'l nuesu actual sistema políticu ta vixente, el partíu de los cien años d'honradez -qué escarniu nel momentu actual- torna a ser mayoritariamente votáu. Ye lo qu'hai.
Nes mesmes páxines cuéntenmos que somos, Asturies, la penúltima rexón en crecimientu n'España, namái superamos a Cantabria. Pero, en cambiu, somos campeones nacionales n'absentismu llaboral. Asuntos menores dambos mientes nun mos suban el preciu de la botella sidra, pero dalgún, nun sé quién, debiera tomar nota ya intentar poner remediu. ¿Haza ónde vamos?
Lo del decaimientu del proyeutu d'enllaz de Veriña llega cuando se vota nel Congresu esos decretos contradictorios de nome Maricarmen. Una tirita que pretende tallar la sangría d'una ferida que requier sutura con dellos puntos, pero asina ye la política moderna, tan dependiente de los asocedíos puntuales que pueden dar un güelpe d'aire qu'hinche les veles de la nave p'asina poder siguir alantre per un tiempu.
La realidá ye que Maricarmen y Ceuta van ser, a día de güei, los temes que lideren la campaña eleutoral venidera; vivienda y emigración en términos fondamentales y duraderos, y, en dambos casos, el Gobiernu actual, nel poder demientres los ocho años caberos, pocu o nada se tien fecho tocantes l'asuntu, pero asina ye la política moderna, na qu'un escándalu tapa l'anterior, como asocediera col apagón, o Adamuz, inclusive cola corrupción, a nivel partíu o familiar, que namái'l pundonor de los xueces, y el ritmu sosegáu de l'apisonadora xudicial pueden facer que siga llamando l'atención del votante.
Tiempos convulsos nes sociedaes occidentales, nun solo n'España, que paecen pasar per un periodu d'intranquilidá que quiciabes seya precursor de dalgo. Quién sabe.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo