El sky-line de Xixón
Va yá dellos años, pasamos una selmana en Nueva York. Yera'l tiempu de los bonos cambeos del dólar col euru y la nuesa economía, la familiar, pasaba per un bon momentu. Quédame l'alcordanza de les dimensiones escomanaes d'aquel mar de cementu, y tamién les coles pergrandes que teníemos de facer pa entrar nes instituciones a visitar, tamién los precios, superiores entoncenes a los Uffizzi de Florencia, o simeyantes europeos, cola esceición de la Hispanic Society, cola so maraviosa sala cola Visión d'España de Sorolla, y que, amás de gratuita, malapenes tenía visitantes.
Agospíamonos nun hotel abondo céntricu, nel piso 27, con vistes al rio Hudson y, pa min más interesante pues siempres me maraviara la visión nochirniega de la gran ciudá, con visión direuta al mundiu de la nueche d'aquellos rascacielos enllenos d'oficines y tamién apartamentos. Tábemos dientro del Sky-line de Nueva York.
La realidá ye que, dentro dentro, d'un sky-line, nun se pued tar, pues suponse qu'esi anglicismu defín la llínea recortada sobro l'horizonte qu'una determinada ciudá produz y que, nel casu de Nueva York, pasa por ser la más nomada del mundiu, nes sos dos versiones, coles Torres xemeles, y la d'anguaño, col One World Trade Center. A min siempres me prestó la versión nochirniega.
Ayeri taba'l Muru de Xixón impresionante pela mañana. Un anunciáu folaxe estremu trayera muncho públicu, al que s'amestaba bastante personal del xigantescu cruceru, blancu rescamblante, que'l sol allumaba nel so atraque na fastera esterior del Musel, y que podía güeyase en toa la so magnitú dende'l Paséu. Anque a min, lo que más me presta ye'l Muru nochirniegu, pues, si bien la cercanía nun permite apreciar esi sky-line, que queda como patrimoniu de los pescadores de chipirones, si qu'ofrez una visión d'otra realidá de la ciudá.
Paseyando'l Muro de nueche, un decátase de la baxa ocupación d'esa parte de la ciudá, posiblemente la más cara per metru cuadráu, y ello seguramente pol elevaá númberu segundes residencies qu'ehí podemos atopar. Ye una realidá qu'ataca'l texíu social de munches ciudades con tirón turísticu, onde'l personal vese obligáu, pol coste de la vivienda y la cesta de la compra, a colar de los centros históricos, deveníos ayalga turística, o la fastera playera, como en Xixón, y con Venezia como exemplu mundial, au yá nun s'atopa un venezianu nel centru históricu; toos se tienen dio a vivir a Mestre y Marghera.
El nuesu Muru tiene, a falta d'esi Sky-line, a San Pedro como ayalga que remata'l collarín urbanu, rescamplante cuando allumáu, y a min, supongo, va siguir prestándome'l s0 paséu nochirniegu. Ye lo qu'hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo