Pal asturianu: dignidá, normalidá, oficialidá
L’asturianu, la llingua asturiana, ye patrimoniu de toos, falantes o non d’ella. Atrévome a dicir más, nós nun somos namáis que meros depositarios d’esti tesoru inmaterial que los nuesos predecesores mos dexaron; una ayalga única nel mundo qu’habemos curiar con procuru y tresmitir a les nueves xeneraciones nes meyores condiciones de sobrevivencia.
Dende fuera d’Asturies nun se ye a entender l’estáu de desatención que los nuesos políticos y responsables tienen acutao pal asturianu. Talo paez que nagüen pola muerte sele de la llingua llariega de Asturies, y nun-y tienen más aquello qu’a esi pariente probe que s’esconde cuando vienen les visites. Trátase, a la fin, d’acorripiala nún gueto.
Yá podemos falar de la enseñanza del asturianu, siempre na llinde cola marxinalidá, de la igua probetaya de la toponimia, de la presencia normal del asturianu nos medios de comunicación públicos que pagamos tolos asturianos, de los concursos lliterarios a los que los nuesos escritores nun se pueden presentar al nun ser l’asturianu reconocíu oficialmente; de poder espresase na nuesa llingua con normalidá y llibertá, yá nun digo n’Ávila, Cáceres o Palencia, digo, y pido disculpes por ello, equí, n’Asturies. Recién tenemos la candidatura d’una organización política que foi refugada por presentar la documetnación pa estes elleiciones n’asturianu, o’l casu d’un funcionariu al que se-y denegó’l permisu pa operase nel hospital por redactar la solicitú n’asturianu, o documentación que l’Alministración nun almite pol fechu gravísimu de presentala nesa llingua; y asina los exemplos y situaciones anónimes que queramos.
Too son pilancos y palos nes ruedes pa col asturianu y los falantes d’asturianu, una xera silente con responsables que tienen nome y apellíos. Da-yos igual qu’haya sentencies xudiciales, llexislación abondo, incluyendo estatal o europea, directrices y alcuerdos internacionales, que pidan respetu y consideración pa la nuesa llingua y los derechos de los asturianos. La última, una sentencia que ye un varapalu pa la Conseyería d’Educación d’Asturies y la so política de discriminación pa cola enseñanza del astuiranu; diz el Ilmu. Sr. Conseyeru que nun la va a cumplir, y quédase tan anchu. Ehí, con un par.
Los derechos de les persones nun-yos importen, eso ye pa otros, pa gallegos, valencianos, catalanes, vascos, navarros o baleares. Ellos sí, ellos tienen derechos, y toos-yos pagamos la normalización y oficialidá de les sos llingües autonómiques; pero n’Asturies, non, equí dicir «esti neñu ye fatu» nun ye falar una llingua, nun ye espresase nuna llingua que merez consideración y respetu, pero p’allá del Eo (agora Ría de Ribadeo, perdón), si val dicir «este neno e tolo»; eso sí ye una llingua como Dios manda, y arriendes merez la normalización, oficialidá, perres, televisión na llingua autonómica y, amás amás, tienen argayu del so emplegu y la defenden arremete. Pero n’Asturies, non, equí debemos de ser marcianos.
Agora ábrese un tiempu nuevu; vienen unes elleiciones que de xuru han traer aires democráticos pal asturianu. Los representantes elexíos, seyan del PSOE, IX, PP, Foro Asturias, URAS-PAS, IDEAS, Bloque por Asturies-UNA, Conceyu Abiertu, u otros, sedrán los que, consensuadamente, sentaos na Xunta Xeneral habrán modificar l’actual marcu del Estatutu d’Autonomía p’Asturies y, nesi sen, hai dos coses a les que hay que dar urxente solución: más y meyor autogobiernu, acompangao de mayor dotación económica –yá se sabe qu’ensin perres tolo demás ye fumu–, y la normalización social del astsurianu, lo que nun pue finar más que cola declaración de la so «esistencia», esto ye, con reconocer a la llingua asturiana de forma oficial y normal. Lo otro sedríen más xuegos florales: más cursinos, cartelinos y dalguna subvención p’allargar l’entierru.
L’asturianu esiste, ta ehí, oyémoslu, y nos sirve pa espresanos y comunicanos; lo mesmo pa cuestiones de ciencia que pa falar colos nuesos fíos y vecinos; nun ye, afortunadamente y pese a dellos, una llingua muerta o escaecida.
Poro, con xenerosidá y altura de mires, ensin mieos nin rocees estúpides y provincianes, el meyor homenax y serviciu cultural que los nuesos polítocos han facer anguañu ye, dende’l necesariu consensu, dotar a la lliteratura y lletres asturianes, a la llingua asturiana y a la fin a tolos asturianos, falantes o non de la llingua propia d’Asturies, de los preseos afayaízos que fagan qu el anuesa llingua pueda ser emplegada en llibertá por toos aquellos a los que-yos pete facelo, y esi camín nun ye otro que la declaración de oficialidá o cooficialidá. Los asturianos, la sociedá asturiana, tien falao yá nes encuestes, y éstes dicen que’l 67% apuesta pola oficialidá. Una oficialidá acordies coles nueses neceseidaes y la nuesa realidá social. con respetu, ensin emposiciones y siempres apostando por soluciones racionales.
La nuesa ye una llingua milenaria de xente cenciella y humilde, y la so defensa y normalización enxamás se pue ver como una agresión a la llingua castellana que toos apreciamos; tolo contrario, l’emplegu del asturianu nun ye más que niciu de xusticia, normalidá, modernidá y d’elemental sentíu democráticu.
Xicu Monteserín, abogáu, miembru de Xuristes Pol Asturianu, Xixón
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo