N' Alcordanza de Justo de Diego: pa mí, un maestru
Na tristura d’esti momentu, alcuérdome de delles lleiciones qu’aprendí de Justo de Diego y que les tengo yo contaes a otros milenta vegaes. Toi falando de cuando yo entá nun sabía lo que yera’l exerciciu de la profesión, taba dando los primeros pasos.
Siendo alumnu d’él (nada de pasante, porque yo nun trabayaba nada, yera él el que perdía’l tiempu aprendiéndome coses a mi), tábemos un día falando de los problemes nel desendolcu d’un xuiciu y díxome bien a les clares que nunca nun-yos ficiera indicaciones nin a los testigos nin a los peritos; ye’l veceru’l que-y tien de dicir al abogáu qué ye lo que saben y qué ye lo que van constestar a les entrugues que-yos faigan. Si nun faes asina, pues alcontrate con que dalgunu d’ellos diga nel xuiciu (como pasó) que ta diciendo lo que-y mandó l’abogáu ya entós... Güei, trenta años dempués, sigo esta lleición al pie de la lletra ¡y lo tranquilu que toi cuando declaren los peritos y los testigos que propuse!
La segunda viénome perbién pa enfrentame a l’exerciciu de la profesión. Un día (de tantos), llamélu pa que m’echara una gabita con una cuestión procesal. Ya en cuentes de falame de la interpretación de la llei, de dame la so opinión, espotóme: «¿En qué xulgáu lu tienes?» Quedé ablucáu anque, siguiendo la conversación, pescancié perfechamente la entruga y aprendí una gran lleición. Una cosa ye tener bona conocencia del derechu y otra ye saber cómo lu interpreta cada xuez, cómo faen en cada xulgáu (Justo sabía de les dos), que ye d’algo camudante, y, por ello, nada nun tien que ver con esa conocencia. Cuando cayí na cuenta d’esto, vi les coses d’otra manera. Lo que tien que te dexar satisfechu ye l’esfuerciu que pones nos asuntos que lleves, non el resultáu, yá qu’eso ta nes manes d’otros.
Y pa qué falar de la so discreición. Si había abogáu nomáu pol so saber, esi yera Justo; tamién tuvo un cargu públicu: decanu del Colexu d’Abogaos, pero nunca nun supi que ficiera gala de nada d’ello. La reconocencia viente dada polos veceros, los collacios y los xueces. Nun creo qu’a Justo-y faltara nenguna d’elles.
Milenta gracias, maestru.
José María Estrada Janáriz, lletráu del Principáu d’Asturies
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo